د ملګرو ملتونو سرمنشي پر اسراییل غږ کړی چې د غزې لارې پرانیزي
د ملګرو ملتونو سرمنشي انتونیو ګوترېش ویلي چې په منځني ختیځ کې د تاوتریخوالي د بیا زیاتېدو له امله ژور اندېښمن دی او له اسراییل غواړي چې د غزې لارې بېرته پرانیزي. ګوترېش ویلي، «ټول بریدونه باید سملاسي ودرول شي. په لبنان، ایران او غزه کې اوربندونه باید په بشپړ ډول مراعات شي».
اسراییل د دوشنبې په ورځ په ایران کې پر څو هدفونو بریدونه وکړل، چې دا د اپرېل له اوربند وروسته لومړی برید و.
دغه بریدونه وروسته له هغه وشول چې ایران پر اسراییل توغندي وویشتل او ویې ویل چې دا په بیروت کې د اسراییلي بریدونو ځواب دی.
ګوترېش همدارنګه ویلي چې اسراییل باید د غزې هغه لارې بیا پرانیزي چې د بشري مرستو د رسېدو پرمخ تړل شوې دي.
