د رویټرز خبر له مخې، روسیې په بالتیک سمندر کې د ناټو له لویو پوځي تمرینونو سره هممهاله خپل سمندري او هوایي تمرینونه وکړل. په دغو تمرینونو کې چې په کالینینګراد کې وشول، شاوخوا لسو روسي جنګي الوتکو او دوو توغندیزو بېړیو ګډون درلود.
د روسیې دغه تمرینونه د جون په اتمه او نهمه نېټه په کالینینګراد سیمه او د هغې په شاوخوا کې وشول.
په دغو تمرینونو کې شاوخوا ۱۰ پوځي جنګي او بم غورځوونکې الوتکې او همدارنګه دوې کوچنۍ توغندیزې بېړۍ شاملې وې.
بل لور ته، ناټو سازمان د «بالټاپس» په نوم خپل تر ټولو لوی سمندري تمرینونه د جون په څلورمه نېټه پیل کړي چې د جون تر ۲۰مې نېټې پورې به دوام وکړي.
په دغو تمرینونو کې د ۱۵ هېوادونو شاوخوا ۲۰ بېړۍ او نږدې ۶ زره پوځي پرسونل برخه اخیستې ده.
کالینینګراد چې د لیتوانیا او پولنډ په څېر د ناټو غړو هېوادونو ترمنځ موقعیت لري، شاوخوا یو میلیون نفوس لري او په لوړه کچه نظامي شوې سیمه ده چې د روسیې د بالتیک د سمندري ځواکونو مرکز هم دی.
