لنډي کوتل کې د امنيتي وضعيت خرابېدو له امله ټولې ښوونیزې ادارې وتړل شوې
د خیبر پښتونخوا د خيبر ولسوالۍ د لنډي کوتل په ذخهخېلو سلطان خېلو سيمه کې د نا امنۍ له امله د یوې جرګې مشرانو او ځایي اوسېدونکو پرېکړه کړې، چې په دغه سیمه کې به ټولې دولتي او خصوصي ښوونیزې ادارې په لنډمهالي ډول وتړل شي.
د یادې جرګې د غړو په وينا؛ د دغه پرېکړې له مخې زدهکوونکي له ښوونځيو څخه خپلو کورونو ته استول شوي او ښوونیز فعاليتونه تر بلې خبرتیا پورې ځنډول شوي دي. د جرګې مشرانو ويلي، چې دغه پرېکړه د زدهکوونکو او ښوونکو د خونديتوب په موخه شوې ده.
د یادې سيمې اوسېدونکو له حکومت او اړونده ادارو غوښتنه کړې، چې په سيمه کې د امن د ټينګښت لپاره بېړني او اغېزمن ګامونه پورته کړي؛ څو ښوونیزې چارې بېرته عادي حالت ته راوګرځي.
تر دې وړاندې د خیبر پښتونخوا سر وزیر سهیل اپریدي هم ویلي و، چې د جګړې له امله له زدهکړو د یوه نسل د بېبرخې کېدو په ګډون پښتونخوا ته درانه هر اړخیز زیانونه اړولي دي. د هغه په وینا؛ جګړې نه یوازې د دغه ایالت اقتصاد زیانمن کړی؛ بلکې پوره یو ځوان نسل یې له زدهکړو بېبرخې کړی او له دې امله د خيبر پښتونخوا ایالت د پاکستان د نورو ایالتونو پرتله شاته پاتې شوی.
