سرچینو افغانستان انټرنشنل ته ویلي، چې د طالبانو د امربالمعروف محتسبان له تېرو دوو ورځو راهیسې د کندهار ښار په بېلابېلو سیمو کې د ښځینه توکو د پلور په مارکیټونو کې پلټنې پیل کړې دي او یو شمېر هټۍوال یې هم بندیان کړي دي.
له کندهار ښار څخه بېلابېلو ځايي سرچینو افغانستان انټرنشنل ته ویلي، چې د طالبانو د امربالمعروف ریاست محتسبینو د تیرې ورځې راهیسې، د کندهار په دوهمه، نهمه، اوومه او شپږمه ناحیه کې، د رنګریزانو دانې، شاهي مارکیټ، نوي مارکیټ او د ګلدوزي په نومونو پلورنځایونو کې چې د ښځو د سینګار توکي پکې پلورل کېږي، پلټنې پیل کړې دي.
د سرچینو په وینا، متحسبانو په مارکیټونو کې ښځو ته بد الفاظ کارول او خبرداری یې ورکاوه، چې نور باید له کوره بهر را ونه وځي.
د کندهار ښار په دوهمه ناحیه کې د ښځو د توکو د یو پلورنځي مسوول د نوم نه ښودلو په شرط وویل:« له پرون راهیسې امربالمعروف والا دلته دوامداره ګزمي کوي، راځي پر دوکانونو باندې ګرځي. ښځو ته بد رد وايي ان هغو ښځو ته هم بد الفاظ کارکوي چې هغوی سپین سرې وي، حجاب او هر څه یې برابر وي».
د سرچینو د معلوماتو لهمخې، د امربالمعروف محتسبانو یو شمېر هټوۍوال هم له ځان سره بیولي او بندیان کړي دي.
سرچینې وايي:« دوکانداران یې ځکه له ځان سره یووړل، چې د دوی په فکر له محرم پرته ښځې یې د سودا لپاره دوکان ته ننوتې وې او یا هم ږیره یې خرېیلې وه».
سرچینو د امربالمعروف د محتسبانو له لوري د نیول شویو هټۍوالو کره شمېر ونه ښود، خو وايي، چې تر اوسه یې کومه ښځه له ځان سره نه ده وړې.
دا په داسې حال کې ده، چې طالبانو د روانې اونۍ د شنبې له ورځې راهیسې په هرات ښار او جبریل ولسوالۍ کې د حجاب په پلمه یو شمېر ښځې نیولې او خلکو یې پر وړاندې غبرګون ښودلی او لاریونونه یې کړي دي.
