بلوچستان کې د ټرانسپورټ او سوداګرو کاربندیز؛ کاروبارونه په ټپه درېدلي دي

دا په داسې حال کې ده، چې د روان کال په اوږدو کې د بلوچستان په بېلابېلو سیمو کې لسګونه بار وړونکو موټرو ته اور اچول شوی چې له امله یې نه یوازې ټرانسپورټي سکټور؛ بلکې ځايي سوداګرو ته هم د مېلیونونه روپیو زیان اوښتی دی.
د بار وړونکو موټرو د ټولنې عمومي منشي روزي خان مندوخېل افغانستان انټرنشنل پښتو ته ویلي، چې تراوسه نږدې ۷۰ بار وړونکي موټر سوځول شوي دي. هغه ویلي: «د یوه بار وړونکي موټر بیه شاوخوا پنځه کروړه روپۍ ده او د دغه پېښو له امله ټرانسپورټرانو ته د مېلیاردونه روپیو زیان اوښتی دی».
د نوموړي په وینا؛ حکومت تراوسه د زیانمن شویو کسانو د تاوان لپاره هېڅ عملي ګام نه‌دی پورته کړی او د دوی اعتصاب به تر نامعلومې مودې دوام ولري. روزي خان مندوخېل زیاته کړې، چې په دغه احتجاج کې د سوداګرو ټولنه او د ټرانسپورټ بېلابېلې ټولنې هم ورسره مل دي.
بلخوا د کوټې د سوداګرۍ او صنایعو خونې مشر ایوب مریاني وایي، چې دوی ۲۵ غوښتنې لري او تر ټولو مهمه غوښتنه یې د امنیت ټینګښت دی. د هغه په وینا، هر ځل د مېلیونونه روپیو زیان اوړي؛ خو د بلوچستان حکومت د تاوان په نوم یوازې لس لکه روپۍ ورکوي.
ایوب مریاني ویلي، چې په دې اړه یې د پاکستان له لومړي وزیر سره لیدلي او د پوځ مشر ته یې هم لیکونه استولي؛ خو غوښتنو ته یې پام نه‌دی شوی. هغه وایي، له همدې امله اوس د اعتراض او احتجاج له لارې پرته بله چاره نه‌لري.د نوموړي په وینا؛ د دوی له اعتراض سره ۲۲ بېلابېلې ټولنې ورسره یوځای شوې دي. ایوب مریاني زیاتوي، چې د بلوچستان په لسو ولسوالیو کې بار وړونکي موټر په نښه کېږي او سوځول کېږي.په همدې حال کې د ځوانو ډاکټرانو ټولنه هم پر ډاکټرې ماه نور د تېزابو شېندلو له برید وروسته له تېرو پنځو ورځو راهیسې په اعتصاب بوخته ده. د ځوانو ډاکټرانو ټولنې پرون اعلان وکړ، چې د بدیل په توګه به په شخصي روغتونونو کې خلکو ته پرته له پیسو اخیستلو روغتیايي خدمتونه وړاندې کړي.بلخوا د روغتیا ریاست د اعتصاب کوونکو پر ضد ګام پورته کړی، د ۲۳ ډاکټرانو دندې یې ځنډولې او ۲۵ نورو ته یې د سپیناوي غوښتنې خبرتیاوې استولې دي. له دې سره هم‌مهاله، د دولتي کارکوونکو د ټولنې ګډې ټلوالې هم په اعتراض لاس پورې کړی دی.د یادې ټولنې مشر قدوس کاکړ پرون د کوټې رسنیز دفتر په غونډه کې وویل، چې د جون پر ۱۱مه او ۱۲مه به د بلوچستان ټول دولتي بنسټونه تړلي وي او کارکوونکي دې خپلو دندو ته نه ورځي.هغه ویلي، دغه اعتراض د کارکوونکو او د هغوی د اولادونو د راتلونکي لپاره ترسره کېږي.قدوس کاکړ زیاته کړې، چې د خپلو راتلونکو ګامونو اعلان به هم ډېر ژر وکړي.