د طالبانو مخالفې ډلې، مقاومت جبهې مشر احمد مسعود په هرات کې د طالبانو لخوا د ښځو نیول او د خلکو پر وړاندې له تاوتریخوالي کار اخیستل په کلکه غندلي او ویلي یې دي چې د هرات د ښځو او نارینهوو ودرېدنه ښيي چې ظلم او زور هېڅکله د خلکو اراده نه شي خاموشه کولای.
احمد مسعود په یوه اعلامیه کې ویلي، چې طالبانو په هرات کې د ښځو په نیولو او د خلکو پر وړاندې په تاوتریخوالي سره یو ځل بیا ثابته کړه چې د دوی واکمني پر وېره، سپکاوي او زورزیاتي ولاړه ده.
هغه زیاته کړې چې د رسنیو د ځپلو او سانسور په شرایطو کې، له هرات او کابل څخه خپاره شوي راپورونه د هغو بېشمېره جرمونو یوازې یوه برخه ده چې د طالبانو د حکومت لخوا په ځانګړې توګه پر ښځو تپل کېږي.
د ملي مقاومت جبهې مشر د هرات مېرمنو ته په خطاب کې ویلي، چې دوی یوازې نه دي او د دغې جبهې غړي د ازادۍ او انساني کرامت د دفاع لپاره د دوی ترڅنګ ولاړ دي. د هغه په وینا، د ښځو له حقونو او ازادۍ څخه دفاع، د ټول افغانستان د عزت او راتلونکي دفاع ده.
مسعود پر ټولو ملي ادرسونو، نخبګانو، سیاستوالو، دیني عالمانو، کلتوري شخصیتونو، رسنیو او نړیوالو مسوولو بنسټونو غږ کړی چې له چوپتیا او مصلحتونو تېر شي او د دغه ښکاره ظلم پر وړاندې روښانه او مسوولانه دریځ غوره کړي.
هغه ویلي چې اوس د ابهام، چوپتیا او بېنتیجې همدردۍ وخت نه دی، بلکې باید د افغانستان د خلکو د مشروع غوښتنو ترڅنګ ودرېږي او پر ولس د جنایتونو د عادي کېدو مخه ونیسي.
