د هلمند لپاره د طالبانو د اطلاعاتو او کلتور ریاست مسوولینو له ځايي رسنیو غوښتي، چې د ملا هبتالله د فرمانونو په اړه دوامداره خپرونې جوړې کړي او په وینا یې:«څو ولسونه لا زیات پوهاوی ترلاسه کړي». هبتالله په تېرو ۵ کلونو کې له نورو مسایلو سربېره د ښځو پر ضد ګڼ فرمانونه صادر کړي دي.
د هلمند ولایت لپاره د طالبانو د رسنیو دفتر د پنجشنبې په ورځ (د غبرګولي ۲۱مه) د یوې خبرپاڼې په خپرولو سره ویلي، د دغه ولایت لپاره د طالبانو د اطلاعاتو او کلتور ریاست د اطلاعاتو امر شېر محمد وحدت په لښکرګاه ښار کې له درېیو خصوصي سیمهییزو غږیزو رسنیو (تعلیم الاسلام راډیو، اعزاز راډیو او ځلاند غږ راډیو) څخه د څارنې په ترڅ کې له هغو غوښتي: «د صادر شویو فرمانونو په اړه دوامدارې خپرونې جوړې کړئ، څو ولسونه لا زیات پوهاوی ترلاسه کړي».
د ځینو خبریالانو په وینا، رسنۍ یوه کار ته مجبورول د بیان ازادي په بشپړ ډول لهمنځه وړي او همداراز له خپل اصلي رسالت څخه لرې کېږي.
په خبرپاڼه کې راغلي: «د اطلاعاتو او کلتور ریاست مسوولین په منظم ډول له ټولو رسنیو څخه لیدنې کوي، څو ټولې رسنۍ او خبریالان په خپل مسلک کې د اسلامي امارت د نافذه قوانینو په رڼا کې خپلو ولسونو ته غوره خدمتونه وړاندې کړي».
د طالبانو مشر هبتالله اخوندزاده په تېرو شاوخوا پنځو کلونو کې په بېلابېلو برخو او په ځانګړې توګه د ښځو د حقونو په تړاو ګڼ فرمانونه صادر کړي او د ښځو ضد فرمانونو یې ګڼ کورني او نړۍوال غبرګونونه هم راپارولي، خو د دغې ډلې ویاند بیا ویلي، چې د دوی پر فرمانونو نیوکو ته باید «ارزښت» ورنهکړل شي.
د یادونې وړ ده، چې دمګړۍ په هلمند کې ۲۳ رسنۍ فعالې دي او کابو غوڅ اکثریت یې غږیزې او چاپي دي، ځکه د طالبانو مشر په دغه ولایت کې د ژوندیو موجوداتو د انځورونو خپراوی منع کړی دی.
