پاکستان یو وار بیا له طالبانو غوښتنه کړې، چې خپل مسوولیتونه ادا کړي او د افغانستان له خاورې د وسلهوالو فعالیتونو مخه ونیسي. د پاکستان د بهرنیو چارو وزارت ویاند طاهر اندرابي خبرداری ورکړی، که له افغانستان نه ګواښ دوام وکړي؛ نو دوی به د ځان د دفاع لپاره لازم ګامونه پورته کړي.
هغه يوې خبري غونډې ته د وینا پرمهال پر افغانستان د بریدونو په اړه ويلي، دغه عملیات یې د دې لپاره کړي چې پر ډیورنډ کرښه د پرتو سیمو اوسېدونکي خوندي کړي او د راتلونکو احتمالي وسلهوالو بریدونو مخه ونیسي.
نوموړي ادعا کړې ده، دغه پوځي ګامونه «محدود او متناسب» وو چې د کره معلوماتو او پوره پلان جوړونې وروسته ترسره شول او یوازې د هغو مرکزونو پر ضد وو چې د وسلهوالو په توګه پېژندل شوي دي.
خو تازه په افغانستان کې د ملګرو ملتونو د مرستندویه پلاوي دفتر (یوناما) ویلي، چې د هېواد پر درېیو ولایتونو خوست، کونړ او پکتیکا د پاکستان هوايي بریدونو له امله ۱۳ ملکي وګړي وژل شوي او ۱۰ نور ټپیان دي.
د طالبانو ویاند ذبیحالله مجاهد هم تېره ورځ ویلي و، چې په دغه بریدونو کې ۱۱ ماشومان، یوه ښځه او یو سپین ږېری وژل شوي دي. پر ملکي وګړو د پاکستان دغه بریدونو پراخ غبرګونونه راپارولي دي.
