د واڼه جرګې د سویلي وزیرستان د امنیت لپاره د بېړنیو ګامونو اخیستو غوښتنه کړې
د سویلي وزیرستان د سولې جرګې مشرانو د سیمې د امنیتي وضعیت پر خرابېدو اندېښنه څرګنده کړې او له اړوندو ادارو یې د سولې او ټیکاو د ټینګښت لپاره د عملي اقداماتو غوښتنه کړې ده.
دغه جرګه د چهارشنبې په ورځ د واڼه په رستم بازار کې جوړه شوې وه. د جرګې ګډونوالو ویلي، په تېرو میاشتو کې په دغه سیمه کې د انسان تښتونې، هدفي وژنو او بمي چاودنو پېښو زیاتوالي د خلکو ترمنځ د وېرې او ناامنۍ فضا رامنځته کړې ده.
د جرګې ویناوالو وویل، ناامنۍ د خلکو پر ژوند، سوداګرۍ او زدهکړو منفي اغېز کړی او له فدرالي او خیبر پښتونخوا حکومتونو، امنیتي ځواکونو او اړوندو ادارو یې غوښتي چې د سیمې د امنیت لپاره جدي او اغېزمن ګامونه پورته کړي.
ګډونوالو د تلپاتې سولې لپاره د ولسي سلا مشورو او د ټولنې د بېلابېلو قشرونو د ګډو هڅو پر اړتیا هم ټینګار وکړ. د سویلي وزیرستان واڼه، برمل، تنای، اعظم ورسک او کلوټای سیمو کې له تېرو درېیو میاشتو راهیسې مخابراتي او انټرنېټي خدمتونه هم پرې شوي دي. ځايي اوسېدونکي وايي، د دغه خدمتونو د نشتوالي له امله د دوی ورځنی ژوند، کاروبار او د ماشومانو زدهکړې اغېزمنې شوې دي.
