د ۲۰۲۶ کال فیفا نړیوال جام په درشل کې امریکا خپلو وګړو ته امنیتي سپارښتنې کړي
د امریکا د بهرنیو چارو وزارت وایي، هغه امریکايي وګړي چې د ۲۰۲۶ کال فیفا نړیوال جام د لوبو لیدلو لپاره مېکسیکو او کاناډا ته سفر کوي، باید د خوندیتوب او امنیتي معلوماتو څخه ځانونه خبر وساتي او د اړتیا په صورت کې د امریکا له سفارتونو او قونسلګریو سره اړیکه ونیسي.
د امریکا د بهرنیو چارو وزارت د سفر اړوند رسمي حساب په خپل ایکس پیغام کې ویلي، چې هغه امریکايي وګړي چې د ۲۰۲۶ کال د فیفا نړیوال جام د سیالیو لپاره په مېکسیکو او کاناډا کې ټکټونه لري، باید د سفر پر مهال له احتیاطه کار واخلي.
په پیغام کې راغلي:«خوند واخلئ او خوندي اوسئ!»
وزارت ټینګار کړی چې په دواړو هېوادونو کې د امریکا سفارتونه او قونسلګرۍ د هر ډول بېړني حالت پر مهال د امریکايي وګړو د مرستې لپاره چمتو دي.
همدارنګه په اعلامیه کې له مسافرو غوښتل شوي چې د خوندیتوب او امنیت اړوند مهم معلومات له ځان سره ولري، څو د اړتیا په وخت کې ترې ګټه واخیستل شي.
