د کورش یوه ۱۲ کسیزه لوبډله په اسیايي سیالیو کې د ګډون په موخه تاجکستان ته لاړه
د افغانستان د کورش ۱۲ کسیزه لوبډله د کورش په پنځلسم پړاو اسیايي سیالیو کې د ګډون په موخه تاجکستان ته لاړه. دغه افغان لوبغاړي او ورسره پلاوی به د اسیايي کورش کنفدراسیون کلني کانګرس او یوه روزنیزه دوره کې هم ګډون وکړي.
د طالبانو د المپیک، بدني روزنې او سپورټ ادارې د پنجشنبې په ماخوستن (د غبرګولي ۲۱مه) د یوې خبرپاڼې په خپرولو سره ویلي، د کورش ۱۲ کسیزه لوبډله د کورش ۱۵م پړاو اسیایي سیالیو کې د ګډون په موخه تاجکستان ته لاړه.
د خبرپاڼې لهمخې، دغه لوبغاړي او ورسره پلاوی به د لوبڅارۍ یو او دوه ستورو روزنیزه دوره او د اسیایي کورش کنفدراسیون کلني کانګرس کې هم ګډون وکړي.
خبرپاڼه زیاتوي: «دغې لوبډلې کې شپږ ورزشکاران، یو روزونکی، څلور لوبڅاران او یو پلاوی شامل دي».
د یادونې وړ ده، چې یادې سیالۍ، روزنیز سمینار او کلنی کانګرس د ۲۸ هېوادونو په ګډون نن پیل شوی او ۳ ورځې به دوام وکړي.
