افغان کرېکټ لوبډله د هند پر وړاندې د دریو یو ورځنیو سیالیو لپاره درمسالا ته ورسېده
د افغانستان کرېکټ بورډ وایي، چې ملي لوبډله د هند پر وړاندې د دریو یو ورځنیو نړیوالو سیالیو د لوبلړۍ د پیل په موخه د هند درمسالا ښار ته رسېدلې ده، چې لومړۍ سیالي به د راتلونکې شنبې په ورځ ترسره شي.
د کرېکټ بورډ په خبرپاڼه کې راغلي، چې د مهالوېش له مخې به افغان لوبډله د راتلونکې شنبې په ورځ د کوربه هندۍ لوبډلې پر وړاندې په لومړۍ یو ورځنۍ نړیواله لوبه کې د سیالۍ ډګر ته ښکته شي.
دا لوبلړۍ په داسې حال کې پیلېږي چې افغانستان د خپلو نړیوالو سیالیو د چمتووالي او تجربې د زیاتولو لپاره له قوي ټیمونو سره د لوبو لړۍ ته دوام ورکوي.
څو ورځې وړاندې د افغانستان او هند ترمنځ ټېسټ نړیواله سیالي د هند په مولنپور (نیو چندیګړ) کې ترسره شوه، چې پکې کوربه هند په بشپړ برلاسي سره بریا خپله کړه.
په دې لوبه کې هند په لومړۍ پاڼۍ کې ۵۶۴ منډې د ۸ ویکټو په زیان جوړې کړې او بیا یې افغانستان ته په دواړو پاڼیو کې ماتې ورکړه. افغانستان په لومړۍ پاڼۍ کې ۱۵۲ منډې او په دویمه پاڼۍ کې ۱۱۲ منډې جوړې کړې، چې هند په یوه پاڼۍ او ۳۰۰ منډو ستره بریا ترلاسه کړه.
