د کندوز اوسېدونکی: د طالبانو ښاروالۍ د مالیې نهورکړې له امله د خلکو د کورونو دروازې وتړلې
د کندوز یو اوسېدونکي افغانستان انټرنشنل ته ویلي، د طالبانو د ښاروالۍ کارکوونکي د دغه ولایت په بېلابېلو سیمو کې کور په کور ګرځي او د هغه بېوزله خلکو د کورونو دروازې تړي چې د یادې ښاروالۍ مالیې یې نهدي ورکړي.
هغه ویلي: «د کندوز په بېلابېلو سیمو کې د طالبانو د ښاروالۍ کارکوونکي کور په کور ګرځي او د مظلومو خلکو دروازې تړي. د خلکو ګناه دا ده، چې دوی د خپلو کورونو مالیه نهده ورکړې. د یادې ډلې لهخوا دغه ډول ظلم او نابرابري لاهم دوام لري».
د هغه په وینا؛ دامهال په کندوز کې ګڼ خلک د بېوزلۍ له امله په خېمو کې ژوند کوي او له پاکستان او ایران نه هم ډېری تازه ستانه شوي کډوال کورونه او سرپناه نهلري. هغه زیاته کړې، له بده مرغه د دغه بېوزله هېوادوالو د ستونزو د حل پرځای طالبان راځي او د نورو بېوزله خلکو د کورونو دروازې تړي.
هغه وایي: «هره میاشت د مالیې اړوند پارچې کورونو ته رسول کېږي. یوه عادي کورنۍ باید تر ۲زره ډېرې افغانۍ ورکړي. ایا دا عدالت دی؟ په داسې حال کې چې زموږ خلک نه کار لري او نه هم ډوډۍ. دغه ډول لګښتونه ظلم دی».
