عباس عراقچي: د اسلاماباد هوکړه نهايي کېدو ته نږدې ده
د ایران د بهرنیو چارو وزیر عباس عراقچي اعلان کړی، چې د اسلاماباد د تفاهم یادښت د نږدې کېدو او نهایي کېدو پړاو ته رسېدلی دی. نوموړي پر اېکس پاڼه لیکلي، تر هغه چې دا هوکړه په بشپړه توګه وروستۍ کېږي، رسنۍ باید د هغې د محتوا په اړه له هر ډول احتمالي اټکلونو ډډه وکړي.
عباس عراقچي ویلي، د دغه یادښت د نهایي کېدو چارې په جدي توګه روانې دي.
نوموړي زیاته کړې ده چې په دې اړه په رسنیو کې خپرېدونکي اټکلونه له وخت مخکې دي او په کار ده چې تر رسمي خپرېدو پورې ورته په تمه شي.
د ایران د بهرنیو چارو وزیر ټینګار کړی دی چې د دوی کړنلاره تل مسوولانه او شفافه ده.
د هغه په وینا، کله چې دغه تفاهم یادښت په بشپړه توګه نهایي شي، ټول جزییات به یې په مناسب وخت کې له عامو خلکو او رسنیو سره په روښانه توګه شریک کړل شي.
عراقچي د دغه تفاهم یادښت د جزییاتو، د خبرو اترو د لورو او په دې اړه د رامنځته شوي پرمختګ په اړه نور معلومات نه دي ورکړي، خو ویلي یې دي چې د نهایي کېدو پړاو ته یې لاره ډېره لنډه شوې ده.
