هند له امریکا سره خلیج کې د خپلو بېړۍ چلوونکو پر وژل کېدو سخت اعتراض شریک کړ
د هند د بهرنیو چارو وزیر اېس جېشنکر د امریکا د بهرنیو چارو له وزیر مارکو روبیو سره په ټېلیفوني خبرو کې په خلیج کې د امریکایي سمندري ځواکونو د هغو بریدونو پر وړاندې د خپل هېواد سخت اعتراض تکرار کړی، چې په پایله کې یې درې هندي بېړۍ چلوونکي وژل شوي دي.
جېشنکر د جمعې په ماخوستن (د غبرګولي ۲۲مه) په خپله اېکسپاڼه لیکلي، چې دا خبرې اترې تېر ماښام ترسره شوې دي.
د هند د بهرنیو چارو وزیر په دغو خبرو کې ټینګار کړی، چې پر سوداګریزو بېړیو دا ډول مرګوني پوځي بریدونه په هېڅ ډول د توجیه وړ نهدي. هغه په خلیج کې د امریکایي ځواکونو دغه اقدامات غندلي او د هند حکومت غبرګون یې د امریکا د بهرنیو چارو وزیر ته رسولی دی.
د راپورونو له مخې، په خلیج کې د امریکایي سمندري ځواکونو په وروستیو بریدونو کې درې هندي بېړۍ چلوونکو خپل ژوند له لاسه ورکړی وو، چې دې چارې د نوي ډیلي او واشنګټن ترمنځ ډیپلوماټیکې ناندرۍ راپارولې دي.
د هند حکومت تر دې وړاندې هم پر دغه ډول بریدونو اندېښنه ښودلې وه او دا یې د نړیوالو سوداګریزو قوانینو خلاف عمل بللی وو.
