له ایران سره د احتمالي هوکړې په اړه د ټرمپ څرګندونې «رواني لوبه» ده

فارس خبري اژانس د امریکا او ایران ترمنځ هوکړې ته د نږدې کېدو په اړه راپورونه رد کړي دي.

فارس لیکلي چې په سویس کې د احتمالي هوکړې لاسلیک یا مخامخ لیدنې په اړه هر ډول اټکلونه «د وړاندیزونو او امریکايي هیلو له ناسم برداشت پرته بل څه نه دي.»

دغه غبرګون وروسته له هغه مطرح شو چې بلومبرګ د باخبره چارواکو له قوله راپور ورکړ چې امریکا او ایران د یوې هوکړې لاسلیک ته، چې د «تفاهم یادښت» په چوکاټ کې به وي، نږدې شوي دي.

د بلومبرګ د راپور له مخې، د سویس جنېو ښار د دغې احتمالي تفاهم د لاسلیک لپاره د ممکنه ځای په توګه مطرح شوی دی.

دغه رسنۍ همدارنګه راپور ورکړی چې په تهران کې د موضوع ارزونه لا هم روانه ده او د وروستۍ تفاهم د ترلاسه کېدو په اړه لا تر اوسه «هیڅ بشپړ باور» نه شته.