ټکسي چلوونکی: د طالبانو ترافیک چارواکو په زرنج کې د ټکسي چلوونکو د کار مخه نیولې ده
له نیمروز ولایت څخه یو ټکسي چلوونکي افغانستان انټرنشنل ته په لېږلي پيغام کې ویلي، چې په دغه ولایت کې د طالبانو د ترافیک چارواکو ټول ټکسي چلوونکي پر سړکونو له کار کولو منع کړي. نوموړي ویلي، چې طالبان د زرګونه ټکسي چلوونکو پوښتنو او ستونزو ته ځواب نه وایي.
نوموړي ویلي، په نیمروز کې د طالبانو د ترافیک مسوولین د ټکسي چلوونکو د کار مخه نیسي او دوی اړ شوي چې تش لاس خپلو کورونو ته ستانه شي. د هغه په خبره، د طالبانو ولایت مقام ته یې هم شکایت کړی؛ خو په خبره یې هیڅوک یې غوښتنو او پوښتنو ته ځواب نه وایي.
نوموړي زیاته کړې: «موږ د نیمروز ولایت مقام ته شکایت وکړ؛ خو هېچا زموږ غوښتنې ته ځواب ونه وایه. د علماوو شورا، د امر بالمعروف ادارې او د ترانسپورټ ریاست ته مو هم شکایتونه وکړل؛ خو هېڅوک د ټکسي چلوونکو ستونزو ته پاملرنه نهکوي».
هغه دا هم ویلي، ان د نیمروز ولایت طالب مسوولینو ته یې عریضې وړاندې کړې چې پایله یې نهده ورکړې. د نوموړي په خبره؛ په دغه ولایت کې شاوخوا ۲زره کورنۍ د همدې ټکسي چلوونې له لارې د خپل ژوند لګښتونه پوره کوي.
