په میرانشاه کې پر تګ‌راتګ لګېدلو محدودیتونو د خلکو ژوند له ګڼو ستونزو سره مخ کړی

د سیمه‌ییزو سرچینو په وینا؛ امنیتي ځواکونه لاهم په میرانشاه او شاوخوا سیمو کې عملیات ترسره کوي. ځایي چارواکي وایي، تر هغه وخته به محدودیتونه پر ځای وي چې امنیتي وضعیت بېرته عادي شوی نه‌وي.
د میرانشاه ـ بنو پر لویه لار تګ‌راتګ د پام وړ کم شوی او د مخابراتي او انټرنېټي شبکو پرې کېدو له خپلوانو، سوداګریزو شریکانو او د سیمې له بهرنیو بازارونو سره د خلکو اړیکې محدودې کړې دي.
ځايي اوسېدونکي وایي، چې په ځینو کلیوالو سیمو کې د خوراکي توکو کمښت مخ په زیاتېدو دی. د دوی په خبره؛ د اوړو، بورې، سبزیجاتو او نورو لومړنیو اړتیاوو د برابرولو بهیر له ستونزو سره مخ شوی او د محدودیتونو دوام کولی شي د توکو د لا کمښت لامل شي.
ښوونیزې ادارې هم د دغه محدودیتونو له امله سختې اغېزمنې شوې دي. د دولتي او خصوصي ښوونځیو د تړل کېدو له امله زرګونه زده‌کوونکي له زده‌کړو بې‌برخې شوي دي. د سیمې یو ښوونکی وایي، د یوولسم او دولسم ټولګیو ازموینې ځنډول شوې او ځینې عملي ازموینې لغوه شوې چې دغه وضعیت د زده‌کوونکو پر راتلونکو زده‌کړو منفي اغېز کولی شي.
د خصوصي ښوونځیو مسوولان وایي، د انټرنېټي خدمتونو د پرې کېدو له امله زده‌کوونکي د انلاین زده‌کړو له بدیل څخه هم محروم دي. د هغوی په خبره؛ د هېواد د لویو ښارونو برعکس، په میرانشاه کې زده‌کوونکي نه حضوري او نه هم انلاین زده‌کړو ته لاسرسی لري.
په همدې حال کې سوداګر هم د کاروبار له کمېدو شکایت کوي. د میرانشاه بازار یو هټۍوال وایي، که څه هم بازارونه پرانیستي دي؛ خو د خلکو د تګ‌راتګ کمېدو او د مخابراتي خدمتونو پرې کېدو له امله سوداګریز فعالیتونه نږدې په ټپه درېدلي دي.
سوداګر زیاتوي، چې د انټرنېټ نشتوالي د بانکي او ډیجیټلي راکړو ورکړو چارې هم ټکنۍ کړې دي؛ ځکه ډېری سوداګریزې معاملې اوس پر انلاین سیستمونو ولاړې دي. د سیمې اوسېدونکي خبرداری ورکوي، که روان محدودیتونه نور هم وغځېږي؛ نو د خوراکي توکو کمښت، اقتصادي ستونزې او د زده‌کړو بهیر ته زیان به لا پسې زیات شي.