د بامیان لپاره د طالبانو ځايي مسوولینو اعلان کړی، چې د بامیان په یکاولنګ ولسوالۍ کې یو تن تښتونکی او قاتل د بابا غره په لوړو سیمو کې په یوه وسلهواله نښته کې وژلی دی. د چارواکو په وینا، دغه کس چې علي نومېده، یوه ځوانه نجلۍ یې تښتولې وه او د هغې ورور یې په بېرحمانه ډول وژلی وو.
د یکاولنګ لپاره د طالبانو ولسوال حکمت حسین مجاهد ویلي، چې تورن علي د «سري ترنوک» کلي اوسېدونکی او تر پېښې وروسته له سیمې تښتېدلی وو. ویل کېږي دغه پېښه د تېرې چهارشنبې په ورځ رامنځته شوې وه.
د بامیان ولایت لپاره د طالبانو د رسنیو دفتر د جمعې په ماخوستن (د غبرګولي ۲۲مه) د یوې خبرپاڼې په خپرولو سره ویلي، د طالبانو امنیتي او کشفي ځواکونو د فراري «مجرم» د نیولو لپاره پراخ عملیات پیل کړل او د هغه پټنځای یې د بابا غره کې وموند.
خبرپاڼه زیاتوي، د بامیان د امنیه قومندانۍ او استخباراتو ځواکونو غوښتل چې دغه مجرم ونیسي او قضايي ارګانونو ته یې وسپاري، خو تورن پر طالبانو ډزې وکړې او په ځوابیه ډزو کې یاد تښتونکی ووژل شو.
له دغې پېښې وروسته، د بامیان لپاره د طالبانو والي ګلحیدر شفق د دغه ولایت اوسېدونکو ته ډاډ ورکړ، چې په ټول ولایت کې بشپړ امنیت ټینګ دی، دا ډاډ داسې مهال کې دی چې په بېلابېلو ولایتونو کې جنایي پېښې او وسلهوالې تښتونې تر بل هر وخت ډېرې شوې دي.
