د خیبر پښتونخوا په بنو کې د هدفي بریدونو له امله دوه پولیس سرتېري وژل شوي
د خیبر پښتونخوا په بنو ولسوالۍ کې په دوو جلا پېښو کې دوه پولیس سرتېري وژل شوي دي. ځایي چارواکي وایي، دواړه بریدونه د جمعې په ورځ (د غبرګولي ۲۲مه) شوي دي.
په لومړۍ پېښه کې د پولیسو سرتېری مشقت امیر هغه مهال د بنو ـ میرانشاه پر سړک د ازاد منډۍ سیمې ته نږدې د وسلهوالو تر برید لاندې راغی، چې له یوې غونډې وروسته کور ته روان و. په بله پېښه کې د پولیسو سرتېری محمد روشن د سېدګي باکه خېل سیمه کې د خپل کور مخې ته د ناپېژاندو وسلهوالو په ډزو کې وژل شوی دی.
پولیسو دواړه پېښې هدفي وژنې بللې او ویلي یې دي، چې په سیمه کې یې د لټون عملیات پیل کړي دي. د سیمې اوسېدونکو د بریدونو غندنه کړې او د عاملینو د نیولو غوښتنه کوي. بنو په وروستیو میاشتو کې د امنیتي پېښو له زیاتوالي سره مخ دی.
