یوشمېر افغان مېرمنې وايي، طالبانو د ښځو پر حجاب د تازه محدودیتونو په لګولو سره افغانستان د ښځو لپاره په «دوزخ» بدل کړی. یوې هراتۍ مېرمنې ویلي: «اوس په بازارونو کې د طالبانو محتسبین ان د ښځو پښې او لاسونه هم ګوري. که د پوستکي یو انچ هم ښکاره شي؛ نو ستونزه جوړوي».
د هغې په وینا؛ د دوی په سیمه کې لسګونه ښځې د طالبانو د امر بالمعروف محتسبینو لهخوا «د بېحجابۍ» په تور نیول شوې دي. نوموړې زیاتوي، په جوماتونو او عامه ځایونو کې خلکو ته خبر ورکړل شوی، چې ښځې به د بشپړ حجاب او د مخ پټولو پرته بهر د تګ اجازه ونه لري.
د راپورونو له مخې؛ طالبانو په هرات ولایت کې ښځو ته نوی لارښود صادر کړی چې له مخې یې باید له کوره د وتلو پر مهال د خپل بدن ټولې برخې په بشپړه توګه پټې کړي.
د سېشنبې په ورځ په هرات کې د طالبانو لهخوا د ښځو د نیولو څپې په غبرګون لاریون د یادې ډلې د ځواکونو لهخوا وځپل شو. خپرو شویو ویډیوګانو کې لیدل کېږي، چې وسلهوالو طالبانو پر لاریون کوونکو مخامخ ډزې کړې دي. په افغانستان کې د ملګرو ملتونو مرستندویه پلاوي (یوناما) ویلي، چې د طالبانو په ډزو کې لږترلږه یو تنکی ځوان وژل شوی او ګڼ نور ټپیان دي.
عیني شاهدانو ویلي، اعتراضونه وروسته له هغې پیل شول چې د طالبانو د امر بالمعروف او نهې عن المنکر محتسبینو د «بېحجابۍ په تور» د ښځو د نیولو لړۍ پیل کړه. د راپورونو له مخې؛ لږترلږه ۳۰ ښځې نیول شوې دي.
ځینې معترضې ښځې وايي، ان هغه ښځې هم نیول شوې چې له وړاندې یې د طالبانو د حجاب مقررات مراعاتول. ورته مهال د هرات یوشمېر اوسېدونکې ادعا کوي، چې په وروستیو ورځو کې په دغه ښار کې د ښځو د لباس د څار او کنټرول کچه په بېسارې توګه لوړه شوې ده. د دوی په وینا؛ د طالبانو د امربالمعروف محتسبین او ښځینه کارکوونکې د ښار په بېلابېلو سیمو کې ښځې دروي او حجاب یې ګوري.
یوشمېر ښځې ادعا کوي، چې د نیول شویو ښځو د خلاصون په بدل کې د هغوی له کورنیو د پیسو د ورکړې غوښتنې هم شوې دي؛ خو طالبانو لاتراوسه د دغه ادعاوو په اړه رسمي غبرګون نهدی ښودلی.
