ډونالډ ټرمپ د واشنګټن او تهران د احتمالي هوکړې افشا شوي معلومات دروغ بللي
د امریکا ولسمشر ډونالډ ټرمپ د ایران د اسلامي جمهوریت هغه ادعاوې په کلکه رد کړې چې ګواکې له واشنګټن سره پر یوې هوکړې سلا شوي دي. نوموړي ویلي، چې د هوکړې په تړاو د تهران افشا شوي شرایط له حقیقت سره هېڅ تړاو نه لري.
ډونالډ ټرمپ پر خپلې ټولنیزې پاڼې لیکلي چې د هوکړې په اړه د ایران کمزورې بیانیه له حقیقت څخه لیرې ده. ټرمپ ایراني چارواکي بېاعتباره بللي او زیاته کړې یې ده چې له هغوی سره په ښه نیت معامله کول امکان نه لري.
ټرمپ دا غبرګون وروسته له هغې وښود چې په رسنیو کې د واشنګټن او تهران ترمنځ د یوې احتمالي هوکړې د شرایطو په اړه ځینې راپورونه افشا شول.
دغو راپورونو په نړیوالو بازارونو هم اغېز کړی و او د تیلو د بیو په راټیټېدو کې یې رول درلود.
د راپورونو له مخې، په فارس خلیج کې د نښتو د پراخېدو د اندېښنو کمېدو او د تهران او واشنګټن ترمنځ د سیاسي تفاهم د نږدې کېدو په اړه د خبرونو خپرېدو، د نفتو په نړیوال بازار کې د بیو د ثبات لامل شوي وو.
خو د ټرمپ وروستیو څرګندونو دا ادعاوې تر پوښتنې لاندې راوستې دي.
