کابل مېشتی: د مخابراتو وزارت امنیتي قوماندان د نورو کسانو پرځای خپل خپلوان پر دندو ګومارلي
یو کابل مېشتي افغانستان انټرنشنل ته ویلي: «موږ هغه اعتراض کوونکي یو، چې په ځینو څانګو کې د بېعدالتۍ، خپلوۍ او له واک څخه د ناوړه ګټې اخیستنې له امله ستړي شوي یو». هغه وایي، د طالبانو د مخابراتو وزارت امنیتي قوماندان د نورو کسانو پرځای خپل خپلوان پر دندو ګومارلي دي.
د هغه په وینا؛ په ځینو دفترونو کې کاري فرصتونه په عادلانه ډول نه وېشل کېږي. نوموړي زیاته کړې، له ځینو بانفوذه اشخاصو سره تړلي کسان ځانګړي امتیازات لري؛ خو عام خلک د یوې ګوله ډوډۍ په پیدا کولو کې له پراخو ستونزو سره مخ دي.
هغه وایي، د طالبانو د مخابراتو وزارت سره دوو کسانو له کلونو راهیسې د فوتوکاپي خدمتونو په وړاندې کولو سره د خپلو کورنیو لګتونه پوره کول؛ خو د طالبانو د مخابراتو وزارت د امنیت برخې قوماندان د خپل نفوذ په کارونې خپل خپلوان هلته ځای کې ځای پرځای کړي او ورته یې د کار زمینه برابره کړې ده.
نوموړی وایي، له دې سره هغه کسانو چې له کلونو راهیسې هلته کار کاوه؛ څنډې ته شوي او د خپلو پېرودونکو او عاید لویه برخه یې له لاسه ورکړې ده. هغه ویلي: «زموږ پوښتنه دا ده، که په دولتي ادارو کې کاري فرصتونه محدود وي؛ نو ولې باید بېوزله خلک له دفترونو بهر د نفوذ لرونکو کسانو د کړنو قرباني شي؟ ایا دا د منلو وړ ده، چې د خپلوانو د ګټو د خوندي کولو لپاره د دولتي واک کار واخیستل شي».
