د رویټرز خبرياژانس د راپور له مخې؛ د امریکا ولسمشر ډونالډ ټرمپ اداره پلان لري، چې د افغانانو په ګډون د کډوالو یوه ډله مرکزي افریقا ته انتقال کړي. په راپور کې راغلي، چې د امریکا او مرکزي افریقا ترمنځ په دې اړه یوه نوې هوکړه هم شوې ده.
باخبره سرچینو او دوو وکیلانو ویلي، د یادې طرحې له مخې لومړۍ الوتنه پلان شوې، چې شاوخوا ۲۰ پناه غوښتونکي به انتقال کړي. په دې ډله کې د افغانانو ترڅنګ د سوریې او ایران وګړي هم شامل دي.
د راپور له مخې؛ په دې ډله کې دوه ایراني ښځې هم شاملې دي، چې د ۲۰۲۴کال په نومبر میاشت کې امریکا ته تر داخلېدو وروسته نیول شوې وې. د دغه ښځو وکیله امیلي تراستل ویلي، چې یوه یې مسیحي مذهب ته اوښتې او بله د دیموکراسۍ فعاله ده او که په زور بېرته واستول شي؛ نو له جدي ځورونې سره به مخ شي.
د وکیلانو په وینا؛ دغه پناه غوښتونکو ته مخکې د امریکا د کډوالۍ یوې محکمې لهخوا د «اخراج د مخنیوي» حکم ورکړل شوی و، چې پهکې ویل شوي وو د هغوی د شکنجې یا څار احتمال په خپلو هېوادونو کې له ۵۰ سلنې زیات دی. خو د ټرمپ اداره «درېیم هېواد ته د اخراج» د قانوني تشې له لارې هڅه کوي، چې دغه کسان د اصلي هېواد پر ځای مرکزي افریقا ته واستوي.
په همدې ډله کې د یوه ترکي وګړي د وکیل له قوله ویل شوي، موکل یې چې له سیاسي ځورونې تښتېدلی؛ ښایي په دې ډله کې شامل شي.
مرکزي افریقا له کلونو راهیسې له سختې بېثباتۍ، داخلي وسلهوالو شخړو او اقتصادي کړکېچ سره مخ هېواد دی او د بشري حقونو فعالان وايي، چې دغه هېواد ته د کډوالو لېږل د هغوی ژوند له جدي ګواښ سره مخ کولی شي.
د راپورونو له مخې؛ د ټرمپ ادارې په وروستیو میاشتو کې له کانګو ډیموکراتیک جمهوریت سره هم د افغان کډوالو د لېږد په اړه خبرې کړې دي، په داسې حال کې چې دغه هېواد د اېبولا ناروغۍ له خپرېدو سره هم مخ دی.
د امریکا د بهرنیو چارو وزیر مارکو روبیو ویلي، چې واشنګټن له څو هېوادونو سره د افغان کډوالو د منلو په اړه سلامشورې کوي؛ په ځانګړي ډول د هغو افغانانو په اړه چې د قطر په پنډغالو کې د امریکا د ویزو او لېږد په تمه پاتې دي.
تر ۸۰ ډېرو دیموکراتو او جمهوريپالو وکیلانو د امریکا د بهرنیو چارو وزیر ته په یو ګډ لیک کې غوښتنه کړې، چې درېیم هېواد ته د افغان کډوالو د لېږد طرحه لغوه کړي. په دغه لیک کې ویل شوي، شاوخوا ۱۱۰۰ افغانان چې پخوا یې له امریکایي ځواکونو سره همکاري کړې له تېرو څلورو کلونو راهیسې په قطر کې له ناروښانه برخلیک سره مخ دي.
د کلرادو ایالت استازي جیسن کرو ویلي، دا د امریکا اخلاقي او د ملي امنیت مسوولیت دی چې له هغو کسانو سره خپلې ژمنې پوره کړي چې د امریکا لپاره یې خپل ژوند له ګواښ سره مخ کړی دی.
قانونپوهان وايي، دغه ډول اقدامات کولی شي د امریکا د کډوالۍ سیاستونو په برخه کې جدي بشري او حقوقي بحثونه نور هم پراخ کړي.
