یو تازه راپور وایي، په افغانستان کې د «باغچه سمسم» خپرونې لوبغاړو او کارکوونکو یوه ډله په ۲۰۲۱کال کې د طالبانو له واکمنېدو وروسته د ځانګړو هڅو له لارې له افغانستان نه واېستل شوه. اوس د پیري پیلټز په نوم یوه مستند جوړوونکې د «باغچه سمسم» ډلې د تخلیې عملیاتو په اړه مستند جوړوي.
«باغچه سمسم» د افغانستان د ماشومانو لپاره یو له مشهورو ښوونیزو پروګرامونو و، چې د سواد زدهکړې، ټولنیز پوهاوي او د نجونو د زدهکړو د ارزښت په اړه یې پیغامونه وړاندې کول.
د راپور له مخې؛ واک ته د طالبانو له رسېدو سره سم د «سېسمي سټریټ» اجرایه مشرې شېري وېسټن نږدې ۴۸ ساعته پرلهپسې هڅې وکړې او د امریکا له پوځي چارواکو سره یې اړیکې ونیولې، څو د یاد پروګرام د کارکوونکو ژوند وژغوري.
د «باغچه سمسم» په نوم د دغه پروګرام افغانه بڼه له ۲۰۱۱کال راهیسې په افغانستان کې خپرېدله او د ماشومانو ترمنځ یې پراخ محبوبیت لاره. راپور زیاتوي، چې دغه پروګرام د نجونو د زدهکړو او سواد زدهکړې د هڅونې له امله د طالبانو له مخالفت سره مخ و.
د معلوماتو له مخې؛ تر ۲۰۱۷کال پورې په افغانستان کې شاوخوا درې مېلیونه ماشومان د یاد پروګرام لیدونکي وو. د راپور له مخې؛ کله چې طالبان کابل ته ننوتل او د امریکایي ځواکونو د وتلو بهیر روان و، د «باغچه سمسم» پروګرام لوبغاړي او کارکوونکي د کابل هوايي ډګر ته د تخلیې لپاره ورغلل.
په دې ډله کې هغه ښځه هم شامله وه، چې د «زري» په نوم د یاد پروګرام د مشهورې نانځکې غږ یې وړاندې کاوه او هغه مهال د مېندوارۍ په وروستیو میاشتو کې وه. خو راپور وایي، دغه ډله په لومړي سر کې هوايي ډګر ته د ننوتو او له افغانستان نه د وتلو له اجازې بېبرخې شوه.
وروسته د امریکايي چارواکو او پوځي بنسټونو په همغږۍ د دوی د ژغورنې لپاره ځانګړي اقدامات ترسره شول. د راپور له مخې؛ امریکايي پوځي چارواکي باور لري، چې د شیري وېسټن هڅو د یادې ډلې د غړو ژوند وژغوره.
