د بلخ اوسېدونکې: په هرات کې د ښځو د نیولو لړۍ په مزارشریف کې هم وېره خپره کړې ده
د بلخ یوې اوسېدونکې افغانستان انټرنشنل ته ویلي، چې په هرات کې د ښځو د نیولو روانې لړۍ په مزارشریف ښار کې هم وېره خپره کړې ده. هغه وایي، له تېرو دوو ورځو راهیسې د مزارشریف واټونه له ښځو خالي شوي دي.
هغې د روضې له شاوخوا اخیستل شوې یوې ویډیو په رالېږلو سره ویلي، دغه سیمه چې پخوا د خلکو او په ځانګړې توګه د ښځو د پام وړ حضور شاهده وه؛ په هرات کې د ښځو د نیولو او ځورولو وروسته خاموشه شوې ده.
هغه وایي: «دا لومړی ځل دی، چې له داسې وضعیت سره مخ کېږي. په ټول ښار کې د وېرې فضا خپره شوې او شاوخوا هیڅ ښځې نه لیدل کېږي».
دا په داسې حال کې ده، چې د بلخ ولایت په مزارشریف ښار کې د طالبانو د امر بالمعروف او نهې عن المنکر ریاست محتسبانو (د غبرګولي ۱۹مه) د روضې په شمال کې له یوه سوداګریز مرکز څخه دوه ښځې د لنډ وخت لپاره نیولې وې.
د ځايي سرچینو په وینا؛ د بلخ ولایت په مزارشریف ښار کې د طالبانو د امر بالمعروف او نهې عن المنکر ریاست محتسبینو د روضې په شاوخوا کې امنیتي تدابیر سخت کړي او پر ښځو یې فشارونه زیات کړي دي.
