د بېپولې ډاکټرانو سازمان ویلي، چې په هرات ولایت کې یې یوه ښځینه کارکوونکې د طالبانو د امر بالمعروف وزارت محتسبینو لهخوا د «بېحجابۍ» په تور نیول شوې او دوه ورځې یې په زندان کې تېرې کړې دي.
د یاد سازمان په وینا؛ دغه کارکوونکې (د جون په ۶مه) د هرات سیمهییز روغتون ته پر لاره وه، چې د امر بالمعروف مامورینو ودروله؛ د هغې مېړه هم ورسره مل و. نوموړې په هغه روغتون کې د ماشومانو په څانګه کې کار کاوه.
یاد سازمان وایي، دغه ښځه له دوو ورځو توقیف وروسته (د جون په ۸مه) خوشې شوه؛ خو تر خوشې کېدو مخکې هغې، د هغې مېړه او د کورنۍ نورو غړو یې طالبانو ته لیکلې ژمنه ورکړه، چې په راتلونکي کې به د یادې ډلې لهخوا ټاکل شوی حجاب مراعتوي.
د بېپولې ډاکټرانو سازمان د خپلې کارکوونکې نیونه غندلې او ویلي یې دي، چې دغه پېښه جلا نهده؛ بلکې په افغانستان کې د ښځو پر وړاندې د محدودیتونو د زیاتېدو یوه برخه ده.
دغه سازمان زیاته کړې، چې په وروستیو ورځو کې په هرات کې ګڼې ښځې د طالبانو د امربالمعروف وزارت د مامورانو لهخوا نیول شوې دي.
دغه سازمان خبرداری ورکړی، چې د ښځو پر تګراتګ، زدهکړو او کار لګېدلي محدودیتونه نه یوازې د ښځو بنسټیز حقونه تر اغېز لاندې راولي؛ بلکې روغتیايي خدمتونو ته د خلکو لاسرسی هم له ستونزو سره مخ کوي.
د دغه سازمان د معلوماتو له مخې؛ په افغانستان کې ۴۵ سلنه روغتیاپالې ښځې دي او د مور او ماشوم د روغتیا په پروګرامونو کې تر نیمایي زیاتې کارکوونکي ښځې دي. دغه سازمان وایي، ښځینه روغتیايي کارکوونکې د ښځو لپاره په ځانګړو روغتیايي مرکزونو کې د خدماتو وړاندې کولو لپاره حیاتي رول لري.
بېپولې ډاکټران دامهال د افغانستان په اوو ولایتونو کې اووه روغتیايي پروګرامونه پر مخ وړي او د مور او ماشوم، ټپیانو او نري رنځ ناروغانو ته روغتیايي خدمتونه وړاندې کوي.
