لوړپوړی امریکايي چارواکی: له تهران سره یوې پیاوړې هوکړې ته رسېدلي یوو
یوه لوړپوړي امریکایي چارواکي رویټرز خبري اژانس ته ویلي، واشنگټن په دې باور دی چې له ایران سره یوې «پیاوړې» هوکړې ته رسېدلی دی. په ورته مهال د ایران د بهرنیو چارو وزارت ویاند هم ویلي چې په راتلونکو ورځو کې د تهران او واشنگټن ترمنځ د هوکړې د وروستۍ کېدو احتمال ډېر دی.
دغه امریکایي چارواکي د شنبې په ورځ رویټرز ته ویلي، د دې هوکړې له نهایي کېدو او لاسلیک وروسته به امریکا د هرمز تنګي د ماینپاکۍ په عملیاتو کې برخه واخلي. یاد چارواکي د هوکړې د موادو یا د هغې د نهایي کېدو د دقیق وخت په اړه نور جزییات نه دي ورکړي.
بلخوا د ایران د بهرنیو چارو وزارت ویاند اسماعیل بقايي د واشنگټن سره د تفاهملیک د نهایي کولو لپاره جنیوا یا اسلاماباد ته د ایران د مذاکراتي پلاوي د احتمالي سفر د پوښتنې په ځواب کې وویل: «د لاسلیک د دقیق وخت په اړه باید په تمه پاتې شو.» همدارنګه بقايي ټینګار وکړ چې په راتلونکو یوې یا دوو ورځو کې جنیوا یا کوم بل ځای ته د سفر کولو هیڅ برنامه شتون نه لري.
تر دې وړاندې، د پاکستان لومړي وزیر شهباز شریف هم پر اېکس پاڼه لیکلي وو، تهران او واشنگټن له بل هر وخت څخه د سولې یوې هوکړې ته نږدې شوي او ښايي چې دا هوکړه په راتلونکو ۲۴ ساعتونو کې نهایي شي. هغه دغه راز اعلان وکړ چې پاکستان د امریکا او ایران ترمنځ د دغه تفاهملیک له نهایي کېدو سمدستي وروسته، د هغې د برېښنايي لاسلیک لپاره چمتووالی لري.
