په قطر کې د امریکا په یوې پخوانۍ پوځي اډه کې مېشته ۱۵ کلنه افغان کډواله زهره محب وایي، د امریکا د ولسمشر ډونالډ ټرمپ له لوري د کډوالو د مېشتېدو پروګرام له ځنډېدو وروسته د زرګونه افغان کډوالو راتلونکی له ناروښانه برخلیک سره مخ شوی دی.
زهره محب چې له خپلې کورنۍ سره د دوحې ښار په السیلیه پنډغالي کې شپې سبا کوي ویلي، چې له دوو کلونو راهیسې په دغه پنډغالي کې بندپاتې دي او د راتلونکې لپاره یې هیلې مړاوې شوې دي.
هغې یوې رسنۍ ته ویلي، کله چې ناروغان د درملنې لپاره له پنډغالي بهر وړل کېږي،؛ څارونکي وسایل پرې لګول کېږي څو له پنډغالي ونه تښتي. د نوموړې په وینا؛ د پنډغالي چارواکو له رسنیو سره د خبرو کولو له امله هغې او کورنۍ ته یې خبرداری هم ورکړی او بېرته افغانستان ته د استولو ګواښ یې ورکړی.
زهره محب ادعا کړې، چې د پنډغالي ځینې چارواکي په یاد پنډغالي کې مېشت افغانان بېرته افغانستان ته د ستنېدو لپاره هڅوي او د دې کار په بدل کې د پیسو وړاندیز هم کوي. د هغې کورنۍ د امریکا د پخواني حکومت پرمهال د کډوالۍ ټول قانوني پړاوونه بشپړ کړي؛ خو لاهم نه پوهېږي چې کله او کوم هېواد ته به ولېږدول شي.
د راپور له مخې؛ د امریکا حکومت د السیلیه پنډغالي د اوسېدونکو لېږد لپاره د نورو هېوادونو په ګډون ځینې وړاندیزونه ارزولي وو؛ خو لاتراوسه وروستۍ پرېکړه نهده شوې. زهرې محب له ډونالډ ټرمپ او د هغه له مېرمنې غوښتي، چې افغان کډوالو ته د امریکا د تګ فرصت ورکړي. هغې ویلي، افغان کډوال د خوندي ژوند او انساني کرامت حق لري.
په همدې حال کې یوشمېر امریکايي سناتورانو او د کانګرس غړو د بهرنیو چارو له وزارت غوښتي، چې په السیلیه پنډغالي کې د مېشتو افغانانو د راتلونکي په اړه روښانه پلان وړاندې کړي.
د راپور له مخې؛ ۸۳ امریکايي قانون جوړوونکو د بهرنیو چارو وزیر ته په یوه لیک کې د دغه افغان کډوالو د وضعیت په اړه د وضاحت غوښتنه کړې او د ځواب لپاره یې (د جون تر ۲۴مې) نېټې وخت ټاکلی دی.
اوسمهال د قطر په السیلیه پنډغالي کې له زرو ډېر افغان کډوال ژوند کوي، چې ډېری یې ښځې او ماشومان دي او د امریکا له حکومت څخه د خپل برخلیک د روښانه کېدو په تمه دي.
