په افغانستان کې د ملګرو ملتونو د بشري چارو د همغږۍ دفتر (اوچا) ویلي، د بامیان ولایت په لرو پرتو سیمو کې بشري اړتیاوې لا هم لوړې دي او ډېری کورنۍ د اوبو، خوړو او بنسټیزو خدمتونو له کمښت سره مخ دي.
د افغانستان لپاره د اوچا دفتر مشرې اولګا چېریفکو د بامیان ولایت یکاولنګ ولسوالۍ ته د سفر پرمهال ویلي، دا د یاد ولایت له هغو سیمو ده چې ترټولو ډېرې بشري اړتیاوې لري.
هغې ویلي، د سیمې اوسېدونکو ورته ویلي چې د اوبو د کمښت له امله د کلي نږدې نیمایي اوسېدونکي شاوخوا پنځه کاله وړاندې نورو سیمو ته کډه شوي دي.
د نوموړې په وینا؛ په سیمه کې یوازینۍ څاه د خلکو لپاره د څښاک اوبو بنسټیزه سرچینه ده او ګڼ شمېر کورنۍ پرې تکیه کوي. د اوچا استازې ویلي، بشري مرستندویه بنسټونه هڅه کوي تر ټولو زیانمنو خلکو ته اړینې مرستې ورسوي؛ خو د خلکو اړتیاوې لا هم پراخې دي او لا ډېرو مرستو ته اړتیا شته.
هغې د یوې مېرمنې په حواله ویلي، چې یوازې د جګړې پای ته رسېدل بسنه نهکوي؛ بلکې خلک داسې ژوند غواړي چې بېرته خپلو سیمو ته د ستنېدو هیله ولري.
چیریفکو زیاته کړې، سوله هغه مهال اغېزمنه تمامېدای شي چې خلک کافي خواړه، روغتیايي خدمتونه او د ژوند لومړنۍ اسانتیاوې ولري. د اوچا په وینا؛ د افغانستان په ګڼو کلیوالو سیمو کې وچکالي، بېوزلي او د بنسټیزو خدمتونو کمښت لا هم د خلکو د ژوند پر شرایطو ژور اغېز لري.
