د افغان ښځینهو کرېکټ جلاوطنه لوبډلې برخلیک به د کرېکټ نړۍوالې شورا په غونډه کې وڅېړل شي
د کرېکټ نړۍواله شورا وایي، د افغان ښځینهو کرېکټ جلاوطنه لوبډلې د مالي ملاتړ او برخلیک موضوع به د راتلونکې میاشتې په کلنۍ غونډه کې تر بحث لاندې ونیول شي. ټاکل شوې ده، چې د کرېکټ نړۍوالې شورا کلنۍ څلور ورځنۍ غونډه د جولای په اتمه د سکاټلنډ په اډینبرو ښار کې پیل شي.
د راپورونو له مخې؛ د افغان ښځینهو کرېکټ جلاوطنه لوبډلې لپاره د اوسني مالي ملاتړ پروګرام د روان کال په اګست میاشت کې پای ته رسېږي. تېر کال د انګلستان، اسټرالیا او هند کرېکټ بورډونو او د کرېکټ نړۍوالې شورا په ګډه د هغو افغان ښځینه لوبغاړو د ملاتړ پروګرام اعلان کړی و چې په ۲۰۲۱کال کې د طالبانو له بیا واکمنېدو وروسته له افغانستان نه وتلو ته اړې شوې وې.
دغه لوبډلې د ۲۰۲۵کال په جنورۍ کې د اسټرالیا په ملبورن ښار کې خپله لومړنۍ لوبه ترسره کړه او وروسته یې د پنځوس اوریز نړۍوال جام پرمهال هند ته هم سفر وکړ. اوسمهال دغه لوبډله په انګلستان کې د پرمختیايي شل اوریزو سیالیو په لړ کې لوبې کوي.
د انګلستان او وېلز د کرېکټ بورډ د ښځو څانګې مشرې کلېر کانر ویلي، که د کرېکټ نړۍواله شورا د افغان ښځینه لوبغاړو لپاره د دوامداره ملاتړ یوه تلپاتې تګلاره جوړه نهکړي؛ نو دا به د مسوولیت له پامه غورځول وي.
له شلو ډېرې افغانې لوبغاړې چې پخوا د افغانستان د ښځینه کرېکټ ملي لوبډلې غړې وې، د طالبانو له بیا واکمنېدو وروسته له هېواده وتلې دي. دغه لوبغاړې غواړي، چې د نړۍوالو سیالیو لپاره په رسميت وپېژندل شي؛ خو لاتراوسه په دې اړه کومه پرېکړه نهده شوې.
دا په داسې حال کې ده، چې د فوټبال نړۍوال فدراسیون (فیفا) د روان کال په اپرېل میاشت کې افغان ښځینه فوټبالرانو ته د نړۍوالو سیالیو د بېرته ګډون اجازه ورکړه.
