د پاکستان لومړی وزیر: تهران او واشنګټن د سولې هوکړې ته نږدې شوي دي
د پاکستان لومړي وزیر شهباز شریف اعلان وکړ چې تهران او واشنګټن تر بل هر وخت د سولې هوکړې ته نږدې شوي دي او ښايي دا هوکړه په راتلونکو ۲۴ ساعتونو کې وروستۍ شي.
شهباز شریف ویلي، پاکستان د امریکا او ایران ترمنځ د سولې د هوکړې د برېښنایي لاسلیک لپاره، د هغې له وروستي کېدو سره سم، چمتووالی نیسي.
تردې وړاندې، یوه جګپوړي امریکایي چارواکي رویټرز خبري اژانس ته ویلي وو چې د امریکا او د ایران مذاکره کوونکي د جګړې د پای ته رسولو لپاره د هوکړې وروستیو پړاوونو ته نږدې شوي دي او ښايي لري دا هوکړه په راتلونکو ورځو کې په اروپا کې لاسلیک شي.
د دغه چارواکي په وینا، په دې هوکړه کې د اټومي وسلو نه جوړولو یا هغو ته د نه لاسرسي په اړه د ایران ژمنه، د هرمز تنګي پرانېستل او د امریکا د محدودیتونو لغوه کول شامل دي.
هغه همدارنګه زیاته کړه چې د ایران د کنګل شویو شتمنیو ازادول به یوازې د ټاکل شویو شرایطو په وړاندې د تهران د غاړه اېښودلو د کچې له مخې ترسره شي.
په ورته مهال د ایران د بهرنیو چارو وزیر عباس عراقچي هم په دې اړه وویل: «ښايي په څو راتلونکو ورځو کې به زموږ او امریکا ترمنځ تفاهملیک لاسلیک شي.»
هغه زیاته کړې چې د تفاهملیک لاسلیکول، د خبرو اترو له وروستیو پړاوونو څخه تر تېرېدو وروسته، په ډیجیټلي بڼه او له لیرې لارې ترسره کېږي.
