«ناموسي» وژنې؛ د پاکستان په پنجاب ایالت کې یو کس خپله لور، زوم او یو کارکوونکی په ډزو وژلي
د پاکستان د پنجاب ایالت په ګوجرانواله ولسوالۍ کې پولیس وايي، یو سړي د «ناموسي شخړې» په تړاو خپله لور، زوم او یو کارکوونکی په ډزو وژلي دي. د پولیسو په وینا؛ پېښه د ګوجرانواله ښار د منډیاله وریاچ سیمې اړوند د کنټونمنټ پولیسو حوزې کې رامنځته شوې ده.
د لومړنیو معلوماتو له مخې؛ د طارق په نوم د سیمې د یوه اوسېدونکي لور فایزه له اختر وروسته د عبدالوحید په نوم له یوه ځوان سره د خپلې خوښې واده کړی و. پولیس وایي، دغه جوړه له لوی اختر وروسته بېرته کلي ته ستنه شوې وه چې د شپې لهخوا پرې برید وشو.
د پولیسو د معلوماتو له مخې؛ طارق پر خپلې لور او زوم ډزې وکړې، چې دواړه ځای پرځای ووژل شول. د پېښې پرمهال د هغه یوه کارکوونکي چې بوټو نومېده، هڅه وکړه د یادې پېښې مخه ونیسي؛ خو هغه هم په ډزو ووژل شو.
پولیسو ویلي، چې د جرم د ځای شواهد راټول شوي او د پېښې په اړه پلټنې روانې دي. د کنټونمنټ حوزې د پولیسو مشر زبیر سیال ویلي، لومړنۍ څېړنې ښيي چې د پېښې انګېزه ښايي ناموسي شخړه وي؛ خو وروستۍ پایله به د شکمن کس له نیولو او پوښتنو ګروېږنو وروسته څرګنده شي.
د ګوجرانواله ښار د پولیسو مشر ډاکټر غیاث ګل خان د پېښې د جدي څېړنې امر کړی او امنیتي ځواکونو ته یې لارښوونه کړې، چې شکمن کس ژر تر ژره ونیسي. پولیس وایي، د پېښې اصلي تورن له سیمې تښتېدلی او د نیولو لپاره یې عملیات روان دي.
