د بيبيسي نړۍوالې خبریالې لایس دوسېټ چې «په کابل کې تر ټولو غوره هوټل» په نوم کتاب یې د ښځو د غیر افسانوي برخې ادبیاتو جایزه ګټلې ویلي، نړۍ باید د افغانستان وضعیت هېر نهکړي او د افغان ښځو او نجونو پر حقونو لګېدلي محدودیتونه د منلو وړ نهدي.
نوموړې ویلي، افغانستان له نړۍوالو سرلیکونو وتلی؛ خو نړۍواله ټولنه باید داسې حالت ونه مني، چې پهکې نجونې له شپوم ټولګي وروسته له زدهکړو محرومې وي، ښځې پوهنتونونو ته د تګ اجازه ونه لري او له ګڼو دندو منع شوې وي.
هغه چې له څلورو لسیزو راهیسې د افغانستان په اړه راپورونه جوړوي ویلي، د خپل کتاب له لارې یې هڅه کړې د افغانستان معاصر تاریخ د خلکو د ژوند له زاویې بیان کړي. هغې د کابل انټرکانټیننټال هوټل د افغانستان د وروستیو لسیزو د سیاسي بدلونونو د کیسې لپاره د یوه سمبول په توګه کارولی دی.
د نوموړې په وینا؛ دغه هوټل د شوروي یرغل، کورنیو جګړو، د طالبانو د لومړۍ واکمنۍ، د جمهوري نظام او بیا د طالبانو د واکمنۍ پرمهال فعال پاتې شوی دی. دوسېټ ویلي، د کتاب اصلي کردارونه هغه افغانان دي چې له کلونو راهیسې په دغه هوټل کې کار کوي او د هېواد د بېلابېلو پړاوونو شاهدان پاتې شوي دي.
هغې د ۲۰۲۱کال په اګست کې د کابل سقوط او د امریکايي ځواکونو وتل د خپل مسلکي ژوند له تر ټولو سختو او دردناکو تجربو بللی دی. د بيبيسي دغه خبریالې ویلي، د طالبانو له بیا واکمنېدو وروسته ښځې په تدریجي ډول له ټولنیز ژوند څخه اېستل شوې دي.
د هغې په وینا؛ نجونې له منځنیو او لوړو زدهکړو بېبرخې شوې، ښځې له ګڼو دندو منع شوې او پر هغوی نور محدودیتونه هم لګېدلي دي. دوسېټ ویلي، د افغان ښځو زړورتیا د ستاینې وړ ده؛ خو د هغوی وضعیت ورځ تر بلې خرابېږي او دا د نړۍوالې ټولنې لپاره د شرم خبره ده.
هغې همداراز ویلي، چې افغان ښځې نه یوازې په خپل هېواد کې له ستونزو سره مخ دي؛ بلکې بهرنیو هېوادونو ته د زدهکړو او کډوالۍ په برخه کې هم له ګڼو خنډونو سره مخامخ دي.
نوموړې ټینګار کړی، چې له ۲۰۰۱کال وروسته شل کلنه دوره بېپایلې نه وه او په همدې موده کې د افغانستان په تاریخ کې تر ټولو لوستې او له نړۍ سره تړلی نسل رامنځته شو. دوسېټ ویلي، نن ورځ ډېرې افغان نجونې د زدهکړو او خپلو حقونو ترلاسه کولو لپاره مبارزه کوي او د خپلو حقونو په اړه پوره پوهاوی لري.
هغې د افغانستان د راتلونکي په اړه ویلي، افغانان تل دا خبره کوي چې «وروستی شی چې مري، هغه هیله ده» او د افغانستان تاریخ ښيي چې هېڅ سیاسي نظام تلپاتې نهدی.
