د طالبانو د ټولګټو چارو وزارت خبر ورکړی، چې د تېرې غویي میاشتې په لړ کې د اوسپنې پټلۍ له لارې یو مېلیون او ۳۸۲۱ مټریک ټنه انتقالات شوي دي. د دغه وزارت په وینا؛ یاد انتقالات د حیرتان، اقينې، تورغونډۍ او خواف-هرات بندرنونو له لارې شوي دي.
د دغه وزارت لهخوا د شنبې په ورځ (د غبرګولي ۲۳مه) په خپرې شوې خبرپاڼه کې راغلي، له یادې ډلې د حیرتان بندر له لارې ۶۸۸زره او ۴۷۴ ټنه، د اقینې بندر له لارې ۹۵زره او ۱۲۱ ټنه، د تورغونډۍ بندر له لارې ۹۷زره او ۳۶۹ ټنه او د خواف–هرات له لارې ۱۲۲زره ۸۵۷ ټنه انتقالات شوي دي.
یاد وزارت ویلي، چې په دې کې نفتي، غیرنفتي او نور توکي هېواد ته وارد او صادر شوي دي. د دغه وزارت د معلوماتو له مخې؛ په همدې میاشت کې ۴زره او ۲۴۶ ټنه صادرات هم شوي، چې لویه برخه یې وچه مېوه، کاني ډبرې او د انارو جوس جوړوي.
یاد وزارت ویلي و، چې په ۱۴۰۴کال کې ټولټال ۳۳۲زره او ۸۳۷ مټریک ټنه انتقالات شوي وو؛ دا په داسې حال کې ده، چې په ۱۴۰۵کال کې د انتقالاتو کچه تر یو مېلیون مټریک ټنو اوښتې ده، چې د تېرکال پرتله درې برابره زیاتوالی ښيي.
