ټرمپ د جي۷ غونډې پر مهال د منځني ختیځ له مشرانو سره ګوري
د امریکا د حکومت لوړپوړو چارواکو ویلي چې ډونالډ ټرمپ به راتلونکې اونۍ په فرانسه کې د جي۷ سرمشریزې پر مهال د منځني ختیځ له یو شمېر مشرانو سره وګوري.
رویټرز اژانس د امریکايي چارواکو له قوله راپور ورکړی چې ټرمپ به په جلا جلا توګه د مصر، قطر، متحده عربي اماراتو، فرانسې او هند له مشرانو لېدنې وکړي.
یوه امریکايي چارواکي ویلي، ټرمپ به د سرمشریزې پرمهال له مشرانو سره د اقتصادي ودې او پراختیا، د اکمالاتي ځنځیرونو پياوړتیا، ناقانونه کډوالۍ او مصنوعي ځیرکتیا په اړه خبرې وکړي.
د امریکايي چارواکو په خبره، ښايي ډونالډ ټرمپ د سرمشریزې په څنډه کې د اوکراین له ولسمشر ولاديمیر زېلېنسکي سره هم وګوري.
