دایکنډي کې یو ښوونکی: بل ښوونځي ته د بدلېدو هوکړې لپاره مې طالبانو ته ۴۰زره افغانۍ ورکړې
د دایکنډي ولایت د اشترلي ولسوالۍ یو ښوونکي افغانستان انټرنشنل ته ویلي، چې د اوږد مزل له کبله بل ښوونځي ته د بدلېدو هوکړې لپاره یې په دغه ولایت کې د طالبانو پوهنې رییس ته ۴۰زره افغانۍ ورکړې دي.
هغه وایي: «زما لپاره دا ډېره ستونزمنه وه، چې د ښوونکي په توګه په خپلې کمې تنخوا دغه پیسې راټولې کړم. اړ شوم چې دغه پیسې له سود سره په پور واخلم او د پوهنې رییس ته یې ورکړم».
نوموړي زیاته کړې: «هغه څه چې پر ما پېښ شول، یوازې یوه پېښه نهده؛ بلکې ګڼ ښوونکي د بدلېدو بهیر او اداري کارونو پرمهال له ورته ستونزو شکایت کوي، خو د خپلو دندو له لاسه ورکولو له وېرې په عامه توګه له خبرو کولو څخه ډډه کوي».
هغه وایي، دغه کس د ګومارنې، بدلېدو او خدمتي کارونه په ټاکلي نرخ پلوري. هغه ویلي: «زما هدف دا نهدی چې له چا سره شخصي دښمني ولرم. زه غواړم د هغو ښوونکو غږ شم، چې له دې امله په چوپه خوله رنځ وړي. زه غواړم چې دغه موضوع د دایکنډي له ښوونکو سره د همکارۍ لپاره خپره شي؛ ترڅو مسوول چارواکي خبر شي».
