د کراچۍ پولیسو ادعا: ټيټيپي ته د ډرون ټکنالوژۍ لېږدونکی مشکوک کس مو نیولی دی
د پاکستان په کراچۍ ښار کې د ترهګرۍ پر ضد د پوليسو څانګې (سيټيډي) ادعا کړې، چې له استخباراتي ادارې سره یې په ګډو عملیاتو کې یو مشکوک کس نيولی دی. د پوليسو په وینا، دغه کس به تحریک طالبان پاکستان یا ټيټيپي ته په ډرون بریدونو کې د کارولو لپاره د ډرون ټکنالوژي او نور مواد لېږل.
د پاکستان په کراچۍ ښار کې د ترهګرۍ پر ضد د پوليسو څانګې (سيټيډي) د شنبې په ورځ (د غبرګولي ۲۳مه) د یوې خبرپاڼې په خپرولو سره ادعا کړې، چې نیول شوی مشکوک کس د طلال عرف زید بلوڅ ورور دی او د دوی په وینا، طلال عرف زید بلوڅ د ټيټيپي یو فعال غړی دی او دا مهال په افغانستان کې مېشت دی.
طالبانو په وار وار د پاکستان دغه ډول څرګندونې رد کړي او ویلي یې دي، چې ټيټيپي د پاکستان کورنۍ مسئله ده.
د کراچۍ ښار د ترهګرۍ پر ضد د پوليسو څانګې همداراز ادعا کړې، چې دغه کس د عصري ډرون ټکنالوژۍ او د چاودېدونکو توکو د پېرلو او رسولو په برخه کې چې په ترهګریزو فعالیتونو کې ترې کار اخیستل کېږي، مرکزي رول درلود.
په خبرپاڼه کې راغلي، چې نیول شوي کس د خپل ورور په لارښوونه د ډرون موتورونه، پروپیلرونه، بیټرۍ، کنټرولر بورډونه او نور برېښنايي توکي پېرل چې په وینا یې، د لاسي بمونو په جوړولو کې ترې کار اخيستل کېدای شي.
د ترهګرۍ پر ضد پوليسو څرګنده کړې، چې له دغه نیول شوي کس څخه یې د موبايلونو او ډرون ترڅنګ یوه اندازه چاودېدونکي مواد هم ترلاسه کړي دي.
دا په داسې حال کې ده، چې په دې وروستیو کې په ځانګړې توګه په خیبر پښتونخوا کې د ډرون په وسیله بریدونه ډېر شوي او تر ډېره پهکې ولسي وګړو ته مرګ ژوبله اوښتې ده.
