اوکراین له روسیې سره د جګړې په ډګر کې د پیاوړتیا لپاره د ۲۰ مېلیارد ډالرو مرستو غوښتنه کوي
د اوکراین یوې دفاعي سرچینې رویټرز ته ویلي، چې کیف د روسیې پر وړاندې د جګړې په ډګر کې د خپل دریځ د پیاوړتیا لپاره له لوېدیځو متحدینو د ۲۰ مېلیارد ډالرو اضافي پوځي مرستې په لټه کې دی.
د سرچینې په وینا؛ ټاکل شوې ده چې دغه غوښتنه به راتلونکې اونۍ د اوکراین د ملاتړو شاوخوا ۵۰ هېوادونو د ټلوالې په غونډه کې وړاندې شي. سرچینې ویلي، د راتلونکې اونۍ په غونډه کې به له ځینو متحدینو غوښتنه وشي چې د ۲۰ مېلیارد ډالرو موخې ته د رسېدو لپاره له ۲ مېلیارده تر ۶ مېلیارد ډالرو پورې مرسته یا پورونه چمتو کړي.
د اوکراین د ډرون برخې قوماندان رویټرز ته ویلي، د ځواک د پراخوالي موخه دا ده چې د روسیې پر اکمالاتي لیکو او ملاتړو مرکزونو د ډرون بریدونه زیات کړي؛ ترڅو مسکو د جګړې له لومړۍ کرښې شاتګ ته اړ کړي.
هغه ټینګار کړی، چې اوکراین د دغه بریدونو د دوام او یادې موخې ته د رسېدو لپاره ډېرو مالي سرچینو ته اړتیا لري. سږکال د روسیې پرمختګونه ورو شوي او تېره میاشت په عملي ډول درول شوي وو. د سرچینو په وینا؛ دا د اوکراین د منځني واټن ډرون بریدونو پایله ده، چې د روسیې د اکمالاتي او لوژستیکي لیکو پر وړاندې په لومړۍ کرښه کې ترسره شوي دي.
