د خیبر پښتونخوا په بنو ولسوالۍ کې د ځمکې پر سر شخړه په خونړۍ نښته بدله شوه او د یوې کورنۍ څلور غړي پهکې ووژل شول. د ژغورنې ادارې د معلوماتو له مخې؛ پېښه د بنو ولسوالۍ د اودین کلي په سیمه کې شوې ده.
د یادې ادارې په وینا؛ د ځمکې پر سر د دوو ډلو ترمنځ پخوانۍ شخړه په تاوتریخوالي واوښته او دواړو خواوو پر یو بل ډزې وکړې. یدغه ادارې ویلي، په ډزو کې د یادې کورنۍ درې نور غړي ټپیان شوي چې ټپیان د دومېل روغتیايي مرکز ته لېږدول شوي؛ خو ډاکټرانو وروسته د ټولو څلورو کسانو د وژنې پخلی وکړ.
د ځایي اوسېدونکو په وینا؛ وژل شویو کسانو کې یو پلار او د هغه دوه زامن شامل دي، په داسې حال کې چې څلورم وژل شوی هم د یادې کورنۍ نږدې خپلوان و. له پېښې وروسته په سیمه کې وېره خپره شوې او پولیسو د قضیې پلټنې پیل کړې دي.
ځایي پولیس چارواکو ویلي، د پېښې د عاملانو د نیولو لپاره عملیات روان دي او د شخړې بېلابېل اړخونه تر څېړنې لاندې دي. ځايي سرچینې وایي، د ځمکې دغه لانجه له اوږدې مودې راهیسې روانه وه؛ خو تېره شپه په خونړۍ نښته واوښته.
