د هرات د جبریل سیمې دیني عالمانو او قومي مشرانو د حجاب په ملاتړ او په دې سیمه کې د شوي لاریون د وضاحت په اړه په یوه رسنیز کنفرانس کې د حجاب پر پلي کېدو ټینګار کړی او پر ځوانانو یې غږ کړی چې د ستونزو د حل لپاره دې د خبرو اترو او تفاهم لاره غوره کړي.
په هرات کې د طالبانو له لوري د حجاب په پلمه د ګڼو ښځو د نیولو په غبرګون کې د هرات د اوسېدونکو تر لاریونونو وروسته، نن د یکشنبې په ورځ په جبریل سیمه کې شیعه دیني عالمانو او قومي مشرانو د حجاب په ملاتړ او د لاریون په تړاو رسنیز کنفرانس ورکړی دی.
د طالبانو تر واک لاندې باختر اژانس د یاد کنفرانس په اړه راپور کې ویلي، چې یادو دیني عالمانو او قومي مشرانو ټینګار کړی چې حجاب یو اسلامي امر دی او ټولنه کې یې رعایتول اړین دي.
دیني عالم محمد مطهري ویلي:« اسلام د انسانانو د عزت او کرامت د ساتلو غوښتونکی دی او د دې کرامت د خوندیتوب یو له اصلي عواملو څخه د حجاب رعایتول دي.»
نوموړي زیاته کړې چې د اسلامي احکامو پلي کول په ټولنه کې د اخلاقي امنیت د ټینګښت لامل ګرځي.
د محمد اکبري په نوم یوه دیني عالم خبرداری ورکړی چې په کور دننه او بهر ځینې کړۍ هڅه کوي د حجاب له موضوع څخه په ګټې اخیستنې د شیعه مېشتو سیمو پر ضد توطیې جوړې کړي.
محمد اکبري له هېوادوالو وغوښتل چې په دې برخه کې له پوره هوښیارۍ کار واخلي او د ناوړه ګټه اخیستونکو په دام کې ښکیل نه شي.
د هرات د جبریل سیمې دغو مشرانو او عالمانو همداراز پر ځوانانو غږ کړی چې د ستونزو د هوارولو او د حل لارې موندلو لپاره تل د خبرو اترو او تفاهم لاره خپله کړي. یادو دیني عالمانو او قومي مشرانو د جبریل د المهدي ښارګوټي د وروستۍ پېښې په اړه یو پریکړه لیک هم صادر کړی، خو په دې اړه یې نور جزییات نه دي ورکړل شوي.
دغه وضاحت او رسنیز کنفرانس داسې مهال دی، چې د خلکو په وینا، طالبانو د هرات له لاریون وروسته خبریالان ګواښلي او دیني عالمان او قومي مخور یې اړ اېستي، چې ددوی د حجاب د پالیسۍ ملاتړ وکړي.
