په کابل کې د طالبانو امنیې قوماندانۍ خبر ورکړی، چې ځواکونو یې د کابل ښار په ۱۳مه حوزه کې د غلو یوه اته کسیزه ډله نیولې ده. بلخوا د طالبانو د کورنیو چارو وزارت وایي، چې د ۱۴زره نشهیي ګولیو د لېږد په تړاو یې په خوست کې یو کس نیولی دی.
په کابل کې د طالبانو د ۱۳مې امنیتي حوزې امر شمسالله حماد ویلي، د نیول شویو کسانو په ډله کې شپږ نارینه او دوه ښځې شاملې دي چې د کابل ښار په بېلابېلو ناحیو کې یې غلاوې کولې.
په کابل کې بیا د طالبانو امنیې قوماندانۍ ویلي، چې نیول شوي کسان د درملتونونو او کورونو په غلاوو تورن دي. د طالبانو په وینا؛ دغه کسانو پر خپلو جرمونو اعتراف کړی او دوسیې یې د نورو څېړنو لپاره عدلي او قضایي ارګانونو ته سپارل شوې دي.
همداراز، له دوی څخه غلا شوي سره زر او نور ګران بیه توکي هم ترلاسه شوي دي. د حماد په خبره؛ یادې ډلې به وسلې او غلا شوي توکي په ښځو بل ځای ته لېږدول. بلخوا د طالبانو د کورنیو چارو وزارت ویلي، چې د خوست ولایت د نادرشاه کوټ ولسوالۍ اړوند یې یو کس د ۱۴زره نشهیي ګولیو د لېږد په تور نیولی دی.
