د پاکستان لومړی وزیر: د امریکا او ایران ترمنځ د سولې هوکړه شوې ده
د پاکستان لومړي وزیر شهباز شریف په یوه تازه بیان کې ویلي چې د امریکا او د ایران اسلامي جمهوریت ترمنځ د «سولې هوکړه» ترلاسه شوې ده.
نوموړي د ایکس خواله رسنۍ په یوه پیغام کې ویلي چې د دواړو لورو ترمنځ له اوږدو او خلاصه خبرو وروسته دا هوکړه شوې او د جګړو د پای ته رسېدو پرېکړه شوې ده.
شریف ویلي چې دواړو خواوو د ټولو جبهاتو، په ځانګړي ډول د لبنان په ګډون، د نظامي عملیاتو د سمدستي او دایمي پای اعلان کړی دی.
د پاکستان لومړي وزیر زیاته کړې چې د دې هوکړې رسمي لاسلیک به د راتلونکې جمعې په ورځ په سویس کې ترسره شي.
هغه همداراز ویلي چې د دې پرمختګ په ترلاسه کولو کې د قطر، سعودي عربستان او ترکیې د منځګړیتوب هڅې مهمې وې او د هغوی له رول څخه یې مننه کړې ده.
شهباز شریف ویلي چې د هوکړې له نهايي کېدو وروسته به منځګړي په روانه اوونۍ کې یو لړ ناستې ترسره کړي څو د تخنیکي خبرو او د رسمي لاسلیک لپاره زمینه برابره شي.
تر اوسه پورې د امریکا او ایران له لوري د دې ادعاوو په اړه رسمي او خپلواک تایید نه دی شوی.
