د افغانستان د کرېکټ غوره لیګ سیالیو مهالوېش اعلان شو

کرېکټ بورډ ویلي، چې د دغه لیګ د لوبډلو د مالکیت لپاره یې د نړۍ پانګه‌والو او سوداګریزو شریکانو ته د ګډون بلنه ورکړې ده. د اعلان له مخې؛ د لوبډلو د ترلاسه کولو لپاره به د غوښتنلیکونو د سپارلو بهیر د روان کال (د جون تر ۳۰مې) نېټې دوام ولري.
د افغانستان کرېکټ بورډ وايي، د دغه لیګ موخه د هېواد د کرېکټ اقتصادي پیاوړتیا، د افغان لوبغاړو لپاره د لا ډېرو فرصتونو برابرول او د افغانستان کرېکټ نړۍوال بازار ته معرفي کول دي.
د بورډ په وینا؛ په متحده عربي اماراتو کې د سیالیو ترسره کېدل به د نړۍوالو لوبغالو، پرمختللو رسنیزو اسانتیاوو او د نندارچیانو پراخ ګډون ته د لاسرسي زمینه برابره کړي.
د افغانستان کرېکټ بورډ رییس میرویس اشرف ویلي، د افغانستان کرېکټ غوره لیګ سیالۍ د هېواد د کرېکټ لپاره یو مهم ستراتیژیک ګام دی. هغه زیاته کړې: «زموږ هدف دا دی، چې یو دوامداره او په نړۍواله کچه پېژندل شوی لیګ رامنځته کړو، چې افغان استعدادونه نندارې ته وړاندې کړي، نړۍواله پانګونه راجلب کړي او د کرېکټ د اوږدمهالې ودې لامل شي».
افغانستان په وروستیو کلونو کې په نړۍوال کرېکټ کې د پام وړ پرمختګ کړی او ګڼ افغان لوبغاړي د نړۍ په سترو شل اوریزو لیګونو کې لوبېږي. کرېکټ بورډ هیله څرګنده کړې، چې نوی لیګ به د افغان کرېکټ د ودې، د سوداګریزو فرصتونو پراختیا او د نړۍوالو سیالیو په کچه د افغانستان د حضور پیاوړتیا لپاره مهم رول ولوبوي.