د پاکستان د جمعیت علمای اسلام ګوند ویاند اسلم غوري وایي، چې وروستی بودیجه د عامو خلکو د اړتیاوو له مخې نه، بلکې د نړیوال وجهي صندوق (اې اېم ایف) د لارښوونو له مخې ترتیب شوې ده او دا به د هېواد اقتصادي وضعیت لا خراب کړي او د بېوزلۍ کچه به نوره هم لوړه کړي.
د دغه ګوند ویاند اسلم غوري په یوه بیان کې ویلي چې «بودیجه د الفاظو یوه ګډوډه لوبه ده» او دا د حکومت د هاغه تګلارې انعکاس دی چې له حقیقتونو سره سمون نه لري.
هغه زیاته کړې چې د حکومت اقتصادي پلان «هایبرډ او له واقعي شرایطو لرې» دی او په کې بزګرانو او کرنیز سکتور ته لازمې اسنتیاوې په نظر کې ندي نیول شوي.
د جمعیت علمای اسلام د څرګندونو له مخې، په نوي بودیجه کې به غریب قشر لا نور غریب شي او متوسطه طبقه به هم د اقتصادي فشار لاندې راشي. ګوند وایي چې د هېواد اقتصاد تر ډېره پر قرضو تکیه کوي، نه پر تولید او داخلي سرچینو.
اسلم غوري ویلي چې په بودیجه کې د انفلاسیون او عامو خلکو د اسانتیاوو ترمنځ لوی واټن موجود دی او تعلیم، روغتیا او د ژوند اساسي اړتیاوې له پامه غورځول شوي دي.
هغه همدارنګه زیاته کړې چې د تنخوا لرونکو خلکو لپاره هم د لوړې بیې سره سم کافي امکانات په پام کې نه دي نیول شوي او د دې پالیسۍ په دوام به په هېواد کې بېوزلي او بېکاري نوره هم زیاته شي.
د جمعیت علمای اسلام ددغه چارواکي په وینا، د سیاسي ثبات او امن پرته اقتصادي ثبات ناشونی دی او روان وضعیت به د هېواد ټول اقتصادي شاخصونه منفي اغېزمن کړي.
