خیبرپښتونخوا کې د سختو ورښتونو، توپان او تندر پرېوتو له امله ۷ کسان مړه او ۳۳ نور ټپیان دي
د خیبرپښتونخوا په بېلابېلو سیمو کې د سختو ورښتونو، توپان او تندر پرېوتو له امله لږترلږه ۷ کسان مړه او ۳۳ نور ټپیان شوي دي. ځایي چارواکي وایي، په مړو شویو کسانو کې ۲ ماشومان، ۴ نارینه او یوه ښځه شامله ده او په ټپیانو کې ۷ نارینه، ۱۲ ښځې او ۱۴ ماشومان شامل دي.
په دغه ایالت کې د طبیعي پېښو د مدیریت ادارې په وینا؛ په تېرو ۲۴ ساعتونو کې د بنو، شانګلې او مانسهرې په ګډون بېلابېلو ولسوالیو کې د کورونو د چتونو او دېوالونو د نړېدو پېښې رامنځته شوې، چې له امله یې د ماشومانو په ګډون ګڼو کسانو ته مرګ ژوبله اوښتې ده.
یادې ادارې خبرداری ورکړی، چې د یاد ایالت په لوړو سیمو کې د واورو چټک ویلي کېدو له امله د ګلیشایي جهیلونو د چاودېدو او ناڅاپي سېلابونو ګواښ شته. د یادې ادارې په وینا؛ د چترال، دېر، سوات، کوهستان او مانسهرې ولسواليو ادارو ته د خطرناکو حالاتو د مخنیوي او د خلکو د ژر خبرولو لارښوونې شوې دي.
ځایي چارواکو له خلکو غوښتنه کړې، چې د سېندونو، خوړونو او سېلابي لارو څخه ځانونه لرې وساتي او د احتمالي ګواښ په حال کې د ځایي ادارو لارښوونې جدي ونیسي.
