د طالبانو تر واک لاندې د افغاني سرې میاشتې ټولنې مشر شهابالدین دلاور د سره صلیب نړۍوال فدراسیون له سکرتر جنرال جګن چاپاګین او د افغانستان لپاره د یاد فدراسیون له مشر حسام فیصل سره په لیدنه کې ویلي، افغانان د جګړو او طبیعي پېښو له امله پراخو بشري مرستو ته اړتیا لري.
د افغاني سرې میاشتې ټولنې د معلوماتو له مخې؛ دلاور په دغه لیدنه کې له افغانستان سره د نړۍوال فدراسیون د دوامداره مالي او تخنیکي همکاریو مننه وکړه او د دغه بنسټ د کارکوونکو رول یې وستایه.
دلاور وویل، د افغاني سره میاشتې ټولنه د سوري زړه او رواني ناروغانو د درملنې ترڅنګ د طبیعي پېښو له امله زیانمنو کورنیو، بېسرپرستو ښځو او راستنېدونکو کډوالو لپاره هم بشري مرستې برابروي.
بلخوا د سره صلیب نړۍوال فدراسیون سکرتر جنرال د افغاني سرې میاشتې ټولنې د دوو کارکوونکو پر مړینه خواخوږي څرګنده کړه او د هغوی له کورنیو سره یې د مرستې ډاډ ورکړ.
هغه وویل، افغانستان ته یې د سفر موخه د افغاني سرې میاشتې د بشري فعالیتونو او خدمتونو ارزونه ده؛ څو د افغانانو اړتیاوې او د مرستو لومړیتوبونه له نړۍوالو شریکانو او مرستندویه بنسټونو سره شریک کړي.
د نوموړي په وینا؛ د سره صلیب نړۍوال فدراسیون به له افغاني سرې میاشتې سره د بشري مرستو او همکاریو ملاتړ ته دوام ورکړي. دواړه خواوو د غونډې په پای کې د بشري، روغتیايي او مرستندویه خدمتونو د پراختیا، د ظرفیت لوړونې پروګرامونو او متقابلو همکاریو پر دوام ټینګار وکړ.
