د روغتیا نړۍوال سازمان: د وینې بسپنې په برخه کې پرمختګ شوی، خو لاهم جدي تشې شته
د روغتیا نړۍوال سازمان په خپل تازه راپور کې ویلي، چې د وینې د خوندیتوب او بسپنې په برخه کې د پام وړ پرمختګ شوی؛ خو لاهم په ټیټ او منځني عاید لرونکو هېوادونو کې د وینې کمښت او د روغتیايي سیستمونو نیمګړتیاوې د خلکو ژوند له ګواښ سره مخ کوي.
راپور چې د نړۍ د ۱۶۸ هېوادونو د معلوماتو پر بنسټ جوړ شوی او د نړۍوال نفوس ۹۷ سلنه استازیتوب کوي ښيي، اوسمهال په نړۍ کې تر ۸۵ سلنې زیاتې د وینې بسپنې د رضاکارو او بېمعاوضې بسپنه ورکوونکو له لوري ترسره کېږي چې د وینې ترټولو خوندي او دوامدارې سرچینې ګڼل کېږي.
د روغتیا نړۍوال سازمان د درملو او روغتیايي محصولاتو د پالیسۍ او معیارونو مشر دیوسدېت موبانګیزي ویلي، چې د خوندي وینې او د وینې محصولاتو ته لاسرسی د پیاوړو روغتیايي سیستمونو بنسټیزه برخه ده او د عامې روغتیا د پراخ پوښښ لپاره مهم ارزښت لري.
د راپور له مخې؛ که څه هم ګڼو هېوادونو د وینې ملي سیستمونه پیاوړي کړي او خوندي انتقالاتو ته یې لاسرسی زیات کړی؛ خو د بودجې کمښت، کمزورې ادارې او ناکافي مالي ملاتړ لاهم په ډېرو هېوادونو کې د وینې خدمات محدودوي.
د روغتیا نړۍوال سازمان ټینګار کړی، چې خوندي وینه د زېږون پرمهال د سختې وینې بهېدنې، بېړنیو عملیاتو، د سرطان درملنې، سختو ناروغیو او د وینې له سخت کمښت سره د مخ ناروغانو لپاره حیاتي ارزښت لري.
راپور خبرداری ورکوي، په هغه سیمو کې چې خوندي وینه نهشته، ناروغان د هغو ناروغیو او ټپونو له امله خپل ژوند له لاسه ورکوي چې د درملنې وړ دي. دغه راپور (د جون په ۱۴مې) د وینې د رضاکارو بسپنه ورکوونکو د نړۍوالې ورځې په مناسبت خپور شوی. سږکال د دغه ورځې شعار «د انسانیت یو څاڅکی؛ وینه ورکړئ، ژوند وژغورئ» ټاکل شوی دی.
