طالبان وایي د ټاپي پروژې ۶۰سلنه چارې بشپړې شوې دي
په هرات کې د طالبانو د والي ویاند محمدیوسف سعیدي وایي، په دغه ولایت کې د ټاپي پروژې د ګازو لېږد نللیکې د غځولو ۸۴ کیلومتره چارې بشپړې شوې او د یادې پروژې عملي کارونه تر دې مهاله شاوخوا ۶۰ سلنه مخته تللي دي.
د نوموړي په وینا؛ د ۱۳۰ کیلومتره نورو نللیکو د غځولو لپاره چمتووالی نیول شوی او د پروژې په مسیر کې ۱۰۸ کیلومتره نوره لیکه هم چمتو شوې ده. هغه زیاته کړې، چې د پروژې د پلي کېدو بهیر په چټکۍ روان دی او اړوندې ادارې هڅه کوي یاده پروژه د راتلونکي زېږدیز کال په لومړیو کې ګټې اخیستنې ته وسپارل شي.
ټاپي د سیمې له سترو انرژۍ لېږدوونکو پروژو ګڼل کېږي. د یادې نللیکې ټولیز اوږدوالی ۱۸۱۴ کیلومتره دی، چې له ترکمنستان نه پیلېږي، د افغانستان او پاکستان له لارې تېرېږي او هند ته رسېږي.
د یادې پروژې د افغانستان برخه ۸۱۶ کیلومتره اوږدوالی لري او په کال کې د ۳۳ مېلیارده متر مکعبه طبیعي ګازو د لېږد ظرفیت لري. دا په داسې حال کې ده، چې یوه اوونۍ وړاندې طالبانو د یادې پروژې د ۵۲ سلنه چارو د بشپړېدو خبر ورکړی و.
