اسماعیل کاکړ چې د افغانستان د جودو او کورش ملي لوبډلې پخوانی غړی و او څه باندې دوه اوونۍ وړاندې د جرمني په برلېن ښار کې د زړه د حملې له امله مړ شوی و، مړی یې کابل ته انتقال شو.
د دغه ۳۰ کلن افغان لوبغاړي د جنازې په مراسمو کې د کورش ملي لوبغاړو او د افغانستان د ورزش برخې یوشمېر مسوولانو ګډون کړی و. د کورش ملي لوبډلې لوبغاړو په ورزشي جامو کې د اسماعیل کاکر مړی د کابل له هوايي ډګره انتقال کړ.
ټاکل شوې ده، چې د نوموړي جنازه نن خاورو ته د سپارلو لپاره خپل ټاټوبي ته ولېږدول شي. اسماعیل کاکر چې په کورنیو سیالیو کې یې لسګونه مډالونه ګټلي وو او په نړۍوالو سیالیو کې یې هم ښې لاسته راوړنې لرلې، په تېرو څه باندې دوو کلونو کې د جرمني په برلین ښار کې اوسېده. نوموړي تېر زېږدیز کال د پاربس په نړۍوالو سیالیو کې د سپینو زرو مډال هم ګټلی و. دغه لوبغاړی چې د کندوز ولایت اوسېدونکی و، له افغانستان نه تر وتلو وروسته یې هم خپلو سپورټي فعالیتونو ته دوام ورکړ او د کورش په برخه کې یې په نړۍواله کچه مهمې بریاوې ترلاسه کړې.
